Qeveria e Kosovës ka nisur sot zyrtarisht subvencionimin e energjisë elektrike për të gjitha kategoritë që kanë aplikuar dhe janë miratuar. Sipas Ministrisë së Financave, zbritjet tashmë po aplikohen automatikisht në faturat mujore të përfituesve, duke përfshirë familjet me të ardhura të ulëta, pensionistët dhe kategoritë e tjera të cenueshme. Qeveria e ka cilësuar programin si një masë të rëndësishme për të lehtësuar barrën financiare të qytetarëve gjatë sezonit të ftohtë dhe për të garantuar stabilitet energjetik. Procesi do të vazhdojë edhe në muajt e ardhshëm, ndërsa priten faza të reja aplikimi për qytetarët që nuk kanë aplikuar më herët.
