Sot, Komandanti i misionit të NATO-së KFOR, Gjeneralmajor Özkan Ulutaş, zhvilloi një takim me Xhelal Sveçlën në Kampin Film City në Prishtinë. Tema kryesore e bisedimeve ishte situata e sigurisë në Kosovë dhe mënyrat për të përmirësuar komunikimin dhe bashkëpunimin mes KFOR-it dhe Policisë së Kosovës.
Gjeneralmajor Ulutaş theksoi angazhimin e KFOR-it për të kontribuar vazhdimisht në ruajtjen e sigurisë në të gjithë Kosovën dhe rajonin përreth. Ai sqaroi se KFOR vepron sipas mandatit të përcaktuar nga Rezoluta 1244 e Këshillit të Sigurimit të OKB-së të vitit 1999, duke siguruar një ambient të sigurt dhe lirinë e lëvizjes për të gjithë qytetarët, në mënyrë të paanshme dhe të vazhdueshme.
KFOR bashkëpunon ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) për t’iu përgjigjur çdo sfide të sigurisë dhe për të mbajtur rendin publik.
Takimi nënvizoi rëndësinë e bashkëpunimit ndërinstitucional për ruajtjen e paqes dhe stabilitetit në Kosovë, si dhe për forcimin e besimit mes institucioneve dhe qytetarëve.