Pamjet e kamerave të sigurisë kanë dokumentuar momentet e atentatit të rëndë që tronditi Sarandën mëngjesin e 20 shtatorit, ku mbeti i vrarë 44-vjeçari Artan Myrtaj, i njohur në qytet me nofkën “Tani i Ruzhdiut”.
Ngjarja ndodhi në zonën e ish-Agjencisë, në një prej kryqëzimeve të frekuentuara të qytetit.
🔴 SI NDODHI ATENTATI?
Sipas dëshmive të mbledhura në vendngjarje, Myrtaj kishte ndaluar për të pirë kafe në një lokal pranë kryqëzimit, pasi ishte ftuar nga një mik.
Ai qëndroi për disa minuta në lokal dhe më pas u ngrit për t’u larguar.
Në momentin që doli jashtë, një motor me dy persona të pajisur me skafandra iu afrua. Autorët hapën zjarr ndaj 44-vjeçarit, por plumbat e parë nuk e goditën.
Myrtaj tentoi të largohej duke vrapuar, por vetëm disa metra më tutje u qëllua sërish dhe mbeti i vdekur në vend.
🎥 AUTORI, I KAPUR NGA KAMERAT
Kamerat e sigurisë kanë fiksuar lëvizjet e njërit prej autorëve.
Në pamje ai shfaqet i veshur me xhup të gjelbër, pantallona të zeza dhe skafandër.
Sipas të dhënave të raportuara nga hetimi, autori dyshohet se ka përdorur dy armë zjarri gjatë atentatit.
Fillimisht ai ka qëlluar me një pistoletë me silenciator, e cila dyshohet se është bllokuar. Më pas, autori ka përdorur një armë tjetër që e mbante në dorën e djathtë.
🗣️ DËSHMITARI TREGON MOMENTET PARA SULMIT
Një dëshmitar ka përshkruar momentet para atentatit.
“Ai piu kafe se e ftoi dikush këtu. U ul, piu kafe dhe i tha shokut që e kishte ftuar se do të ikte. Pas rreth pesë metrash, erdhën dhe bënë goditjen e parë. Ai e kuptoi dhe iku me vrap. Ata e sulmuan.”
🔴 PLAGOSËT EDHE NJË KALIMTAR
Nga breshëria e plumbave mbeti i plagosur edhe një kalimtar i rastit.
Bëhet fjalë për 73-vjeçarin Xhevdet Skëndaj, i cili u qëllua në shpinë, ndonëse sipas raportimeve nuk kishte lidhje me viktimën apo atentatin.
I moshuari u transportua me helikopter drejt Spitalit të Traumës në Tiranë, ku mori trajtim mjekësor.
🚨 AUTORËT U LARGUAN ME MOTOR
Pas atentatit, autorët u larguan menjëherë nga vendi i ngjarjes me motor.
Ngjarja ndodhi rreth 70 metra larg Komisariatit të Policisë së Sarandës. Sipas informacioneve të raportuara, shërbimet e policisë mbërritën rreth 10 minuta pas ngjarjes.
Në vendin e atentatit u gjetën disa gëzhoja të shpërndara në rrugë, të cilat u sekuestruan në kuadër të hetimeve.
🚔 NGRIHEN PIKA KONTROLLI
Rreth një orë pas atentatit, Policia njoftoi ngritjen e pikave të kontrollit në akset rrugore që lidhin Sarandën me Vlorën dhe Gjirokastrën.
Deri në momentin e raportimeve, autorët e atentatit nuk ishin identifikuar.
Hetimet vijojnë për zbardhjen e plotë të rrethanave të ngjarjes, identifikimin e autorëve dhe përcaktimin e motivit të atentatit.