Në Prizren ka nisur një projekt i madh humanitar që do të sjellë strehim për dhjetëra familje në nevojë. Humanisti i njohur, Halil Kastrati, në bashkëpunim me Komunën e Prizrenit dhe kryetarin Shaqir Totaj, ka nënshkruar memorandumin për ndërtimin e 50 shtëpive të reja.
Nga këto, 35 shtëpi do të ndërtohen në një lagje të re, në një parcelë të dedikuar nga komuna, ndërsa 15 të tjera do të ndërtohen në pronat e familjeve që posedojnë tokë, por jetojnë në kushte të rënda banimi.
Kastrati theksoi se ky është një hap i rëndësishëm për të kthyer shpresën dhe dinjitetin te dhjetëra familje që sot ëndërrojnë një shtëpi të tyre. Projekti është përshëndetur gjerësisht nga qytetarët, të cilët e shohin si një shembull të fuqishëm solidariteti dhe bashkëpunimi institucional.
“Ky është edhe një hap tjetër i madh për t’u dhënë dinjitet, ngrohtësi dhe siguri dhjetëra familjeve që sot ëndërrojnë një shtëpi të tyre. Faleminderit Komunës së Prizrenit për bashkëpunimin. Bamirës, Zoti kurrë mos ju humbtë!”, tha Kastrati pas nënshkrimit të marrëveshjes.
Ky projekt është pjesë e iniciativave të vazhdueshme të Shoqatës “Jetimat e Ballkanit”, e cila tashmë prej vitesh kontribuon në përmirësimin e kushteve të jetesës për familjet me nevoja të veçanta në mbarë Kosovën.
Ky zhvillim në Prizren është një shembull i qartë i bashkëpunimit mes sektorit të bamirësisë dhe institucioneve vendore. Derisa shpesh familjet e varfra mbeten të anashkaluara nga politikat sociale, ky projekt sjell një zgjidhje konkrete dhe të prekshme: një shtëpi të sigurt.
Nga ana tjetër, fakti që komuna ka ofruar tokën, ndërsa shoqata bamirëse po financon ndërtimin, tregon se vetëm përmes partneritetit publik-privat mund të arrihet një ndikim i qëndrueshëm social. Përfituesit nuk marrin vetëm një kulm mbi kokë, por edhe një mundësi për të jetuar me më shumë dinjitet, duke e kthyer këtë projekt në një model të mundshëm për komunat tjera të Kosovës.
Në një kohë kur shumë qytetarë përballen me çmime të larta të banimit dhe me mungesë të mbështetjes sociale, iniciativa të tilla bëhen një shpresë reale dhe një kujtesë se solidariteti është ende i gjallë në shoqëri.