Kryeministri i Shqipërisë, Edi Rama, është pritur me nderime nga presidenti legjendar i Real Madridit, Florentino Perez, në stadiumin e famshëm “Santiago Bernabeu” në Madrid.
Gjatë këtij takimi miqësor, Rama tha se ishte “i privilegjuar nga mikpritja” e Perezit, duke e cilësuar atë një viziontar të futbollit modern dhe simbol të suksesit evropian.
Në bisedën mes tyre, është folur për zgjerimin e bashkëpunimit mes Fondacionit të Real Madridit dhe institucioneve shqiptare, me synim sjelljen në Shqipëri të shkollës së futbollit dhe Universitetit të Sporteve që mbështeten nga ky klub prestigjioz spanjoll.
Ky projekt, sipas burimeve pranë qeverisë, synon të ofrojë trajnime profesionale për të rinjtë shqiptarë, të cilët duan të zhvillojnë karrierën e tyre në futboll sipas standardeve të Real Madridit. Gjithashtu, në plan parashikohet edhe ngritja e një kampusi sportiv që do të ndihmojë në promovimin e talenteve lokale dhe në rritjen e bashkëpunimit sportiv Shqipëri–Spanjë.
Ky takim është parë si një hap i rëndësishëm diplomatik kulturor dhe sportiv, që tregon afrimin e Shqipërisë me një nga klubet më të mëdha në botë, jo vetëm në fushën e sportit, por edhe në edukimin e brezave të rinj.
Takimi i Edi Ramës me Florentino Perezin në “Santiago Bernabeu” shkon përtej një vizite simbolike. Ai tregon përpjekjen e qeverisë shqiptare për ta lidhur vendin me standardet më të larta të trajnimit sportiv dhe për ta përdorur futbollin si një urë bashkëpunimi ndërkombëtar.
Nëse projekti i Universitetit të Sporteve dhe shkollës së futbollit realizohet, Shqipëria mund të fitojë jo vetëm në aspektin sportiv, por edhe në imazh, duke u bërë pjesë e një rrjeti ndërkombëtar të zhvillimit të talenteve.
Real Madrid, përmes Fondacionit të vet, ka themeluar qendra të ngjashme në vende të ndryshme, dhe përfshirja e Shqipërisë në këtë iniciativë është një sinjal pozitiv për të ardhmen e sportit shqiptar.