Deklarata e kandidatit të “Listës Serbe”, Slavko Simiq, se “ne jemi ushtarët e Aleksandar Vuçiçit”, ka shkaktuar reagime të forta në opinionin publik dhe në qarqet juridike të Kosovës. Juristi dhe analisti politik Muhamet Kelmendi e ka cilësuar këtë deklaratë si “vepër të rëndë penale që kërcënon drejtpërdrejt sovranitetin e shtetit të Kosovës”.
Në një reagim të publikuar në rrjetet sociale, Kelmendi ka kërkuar veprim të menjëhershëm nga Prokuroria Speciale e Kosovës, duke ironizuar mungesën e reagimit:
“Ku je Prokurori Speciale? Çka pret, ndonjë kafe?”
Sipas tij, deklarata e Simiqit përfaqëson një akt të qartë lojaliteti ndaj një shteti tjetër – Serbisë – dhe shkel Kushtetutën e Kosovës, e cila ndalon çdo formë të nxitjes së ndikimit politik apo institucional nga jashtë.
“Kur një kandidat që synon pushtetin lokal në Kosovë e quan veten ‘ushtar të Vuçiçit’, kjo nuk është më fushatë, por tradhti ndaj shtetit ku jeton dhe për të cilin kërkon vota. Kjo duhet të hetohet menjëherë”, theksoi Kelmendi.
Ekspertë të tjerë të sigurisë paralajmërojnë se një gjuhë e tillë politike e lidhur me Beogradin rrezikon të minojë integritetin territorial dhe stabilitetin institucional të vendit, sidomos në veri të Kosovës, ku “Lista Serbe” njihet për ndikim të drejtpërdrejtë nga qeveria e Vuçiçit.
Reagimi i Kelmendit është bërë viral në rrjete sociale, ndërsa qytetarët kanë kërkuar hetim zyrtar ndaj Simiqit për deklaratën e tij, që shihet si tentativë për të vendosur Kosovën nën komandën politike të Beogradit.
Në anën tjetër, Prokuroria Speciale ende nuk ka dhënë ndonjë reagim publik për këtë çështje.
Kelmendi e përmbylli reagimin e tij me një pyetje që po qarkullon gjerësisht online:
“Kur dikush e quan veten ushtar të një presidenti të huaj, në tokën e Kosovës, a nuk është kjo krim politik dhe penale?”
Deklarata e Slavko Simiqit nuk është thjesht një gafë politike, por një sinjal alarmi për institucionet e sigurisë së Kosovës. Kur kandidatë politikë deklarohen publikisht si “ushtarë të Vuçiçit”, kjo tregon se strukturat e Beogradit vazhdojnë të ushtrojnë ndikim të drejtpërdrejtë në veri të vendit.
Në aspektin juridik, një deklaratë e tillë mund të përbëjë elementet e veprës penale të “nxitjes kundër rendit kushtetues” dhe “bashkëpunimit me shtet të huaj”. Heshtja e institucioneve kosovare në këtë rast do të dërgonte një mesazh të rrezikshëm për integritetin e shtetit dhe sundimin e ligjit.
Në nivel politik, kjo është një përpjekje për të mbajtur gjallë ndikimin e Serbisë në jetën publike të Kosovës. Nëse nuk ka reagim të fortë institucional, “ushtarët e Vuçiçit” mund të ndihen të lirë të veprojnë hapur kundër institucioneve të Kosovës.
Kjo çështje duhet të trajtohet jo si fushatë elektorale, por si çështje sigurie kombëtare. Çdo heshtje është rrezik, çdo reagim është mbrojtje e sovranitetit të Kosovës.