Ankara, 19 qershor 2025 – Turqia ka rritur ndjeshëm masat e sigurisë në kufirin lindor me Iranin, ndërsa tensionet në Lindjen e Mesme janë përshkallëzuar pas sulmeve të Izraelit ndaj objektivave iraniane. Vendimi për vendosjen e masave të shtuara u konfirmua për Reuters nga një burim i Ministrisë së Mbrojtjes Kombëtare të Turqisë, që foli në kushte anonimiteti.
Burimi deklaroi se, pavarësisht se nuk është vërejtur ndonjë fluks i jashtëzakonshëm i refugjatëve nga Irani, Ankaraja ka ndërmarrë hapa të menjëhershëm për të garantuar sigurinë kombëtare dhe qëndrueshmërinë rajonale.
“Po zhvillojmë një sistem të integruar dhe të shtresëzuar të mbrojtjes ajrore dhe raketore me teknologji të prodhuar në vend,” u shpreh zyrtari, duke shtuar se gatishmëria luftarake mbetet në nivel të lartë.
Në kuadër të këtyre masave, janë aktivizuar avionët e Reagimit të Shpejtë të forcave ajrore, të cilët kanë nisur patrullimet përgjatë kufirit me Iranin që në momentin kur nisi përshkallëzimi i situatës mes Teheranit dhe Tel Avivit. Avionët monitorojnë vazhdimisht çdo shkelje të mundshme të hapësirës ajrore, përfshirë edhe ndërhyrje të mundshme nga ana e forcave izraelite.
Turqia, si një aktor kyç rajonal dhe aleat i NATO-s, po përgatitet për të gjitha skenarët e mundshëm, përfshirë përshkallëzimin e një konflikti më të gjerë mes Iranit dhe Izraelit, që rrezikon të përfshijë edhe fuqi të mëdha si Shtetet e Bashkuara të Amerikës.
Masa e fortë ushtarake e Turqisë në kufi me Iranin është një mesazh i qartë: Ankaraja nuk do të lejojë destabilizim të kufijve të saj. Në një rajon ku një përplasje mes dy fuqive si Izraeli dhe Irani mund të shpërthejë në çdo moment, Turqia pozicionohet si një faktor frenues, por edhe si mbrojtëse e kufijve të saj dhe e interesave strategjike në Lindjen e Mesme.