Lansimi i shumëpritur i bashkëpunimit mes Kim Kardashian dhe gjigantit sportiv Nike është shtyrë për një kohë të pacaktuar. Linja e re “NikeSkims”, që pritej të dilte në treg gjatë pranverës së këtij viti, ka hasur në vonesa prodhimi, sipas burimeve të afërta me projektin. Ende nuk është shpallur ndonjë datë e re për publikimin e koleksionit.
Ky bashkëpunim shënon një hap të madh për kompaninë Nike, pasi për herë të parë vendos të krijojë një markë të re në partneritet me një kompani të jashtme – në këtë rast, Skims, e cila njihet për linjën e saj të popullarizuar të shapewear-it të mbështetur nga Kardashian. Sipas një njoftimi të mëparshëm për media, qëllimi i NikeSkims është të “trazojë industrinë globale të fitnessit dhe veshjeve aktive përmes inovacionit të nivelit më të lartë, në shërbim të të gjitha atleteve gra”.
Megjithatë, shumë pak detaje janë bërë publike rreth kësaj linje – përfshirë çmimet dhe imazhet zyrtare. Faqja zyrtare në internet nuk është përditësuar që nga njoftimi fillestar në muajin shkurt.
Ky bashkëpunim është pjesë e strategjisë së CEO-së së Nike, Elliott Hill, për të rigjallëruar markën, e cila këtë vit ka parë rënie prej mbi 20% të vlerës së aksioneve të saj. Nike po përballet me konkurrencë të fortë nga brende si Lululemon, Alo dhe madje edhe Old Navy në segmentin e veshjeve sportive.
Për të rikthyer interesimin dhe përfitimet, Nike po redukton ofertën për modelet klasike si Air Force 1 dhe Pegasus, në përpjekje për të rritur kërkesën dhe për të shitur produktet me çmim të plotë. Gjithashtu, kompania po orienton konsumatorët drejt produkteve më të shtrenjta si linja Air Max për vrapim.
Publikimi i të ardhurave të radhës nga Nike është planifikuar për të enjten që vjen.
Shtyrja e lansimit të NikeSkims është një goditje për ambiciet e Nike për të kapur një treg më të gjerë, veçanërisht tek konsumatorët e rinj dhe të ndjeshëm ndaj stilit dhe identitetit të markës. Bashkëpunimi me Kim Kardashian ishte paraparë si një hap strategjik për të përmirësuar imazhin e kompanisë dhe për të konkurruar më denjësisht në tregun e veshjeve të fitnesit. Vonesat në prodhim mund të nënkuptojnë sfida të brendshme operacionale për Nike, dhe rritin presionin për të performuar më mirë financiarisht në raportin e ardhshëm të fitimeve.