Një ndërtesë në gjendje alarmante po kërcënon përditshmërinë e qytetarëve në hyrje të Prishtinës. Siç shihet qartë edhe në fotografinë e siguruar nga portali Novaflash.info, një objekt i papërfunduar, i braktisur dhe me strukturë të dukshme të paqëndrueshme ndodhet buzë rrugës kryesore që të çon nga kryeqyteti për në Makovc, përballë pikës së njohur të karburanteve Veda Petrol.
Muret e saj janë të çara, kati përdhes është i përkulur dhe i devijuar në mënyrë drastike, ndërkohë që kati i sipërm është pa dritare apo masa sigurie. Kjo ndërtesë, që në shikim të parë duket sikur është vetëm një erë larg rrëzimit, është kthyer në një bombë të heshtur për banorët, kalimtarët, automjetet dhe mbi të gjitha për fëmijët që kalojnë në atë zonë çdo ditë.
Në mungesë të ndërhyrjes institucionale apo të një rrethimi sigurie, kjo shtëpi përbën një rrezik të përhershëm për jetën. Pozicioni i saj afër rrugës e bën edhe më shqetësuese situatën – mjafton një lëkundje e lehtë, reshje intensive ose ndërhyrje e gabuar ndërtimore, për ta kthyer këtë ndërtesë në një tragjedi të paralajmëruar.
Banorët lokalë shprehen të shqetësuar, por deri më tani asnjë autoritet nuk ka marrë masa për ta inspektuar ose rrënuar objektin. A është kjo një shenjë e papërgjegjësisë së institucioneve për sigurinë publike, apo thjesht neglizhencë e vazhdueshme?
Novaflash.info i bën thirrje autoriteteve komunale të Prishtinës dhe institucioneve përkatëse që të ndërhyjnë urgjentisht në këtë rast, para se të jetë vonë. Mjafton një moment pakujdesie që kjo ndërtese të kthehet në vendngjarjen e radhës me pasoja tragjike.
