Këngëtarja e njohur shqiptare, Xhemilja, ka bërë një rrëfim të sinqertë në një intervistë të fundit, ku ka pranuar se është penduar për një nga vendimet e saj artistike në të kaluarën.
Bëhet fjalë për këngën e saj të titulluar “Qyqar”, e cila është publikuar vite më parë dhe që është konsideruar si një kopje e këngës së njohur serbe “Kukavica”, e interpretuar nga këngëtarja Ceca. Në intervistë, Xhemilja u shpreh se ndonëse atëherë e pa si një zgjedhje muzikore, sot ndihet në faj dhe pranon se “i ka rënë pishman”.
“Po, kam bërë gabim. Nuk e kam menduar thellë kur e kam publikuar ‘Qyqar’. Me kohë e kam kuptuar që nuk ka qenë veprim i drejtë dhe më vjen keq që kam marrë një këngë pa të drejtë autori. Kam mësuar nga ajo përvojë”, është shprehur ajo.
Deklarata e saj ka shkaktuar reagime të ndryshme në rrjete sociale, ku disa fansa e kanë përgëzuar për sinqeritetin, ndërsa të tjerë kanë kritikuar faktin që një artist shqiptar ka përdorur materiale nga repertori serb pa i përshtatur siç duhet.
Megjithatë, pendesa publike e Xhemiljes shihet nga shumëkush si një hap i rëndësishëm drejt transparencës dhe etikës në muzikë, një temë që shpesh mbetet në hije në industrinë shqiptare.