Një reagim i drejtpërdrejtë nga Shkupi ka ardhur për kryeministrin në detyrë të Kosovës, Albin Kurti, pas disa deklarimeve të tij për çështjen e gjuhës shqipe në Maqedoninë e Veriut. Ish-ministri i Jashtëm i këtij shteti, Bujar Osmani, ka vlerësuar se ndërhyrjet e Kurtit në çështjet e brendshme të Maqedonisë së Veriut nuk vetëm që ishin të dëmshme për harmoninë ndërmjet komuniteteve, por kanë reflektuar negativisht edhe në përkrahjen politike të Kurtit brenda Kosovës.
“Kam informacione që ky intervenim i kryeministrit ka reflektuar te votuesit e Kosovës ndaj kryeministrit. Besoj se ka qenë mesazh se nuk është mirë të ndërhyhet,” ka deklaruar Osmani. Ai ka theksuar se qytetarët e Kosovës kur vizitojnë Shkupin, e ndiejnë qartë atmosferën e barazisë ndërmjet komunitetit shqiptar dhe maqedonas, duke nënvizuar se ndërhyrjet e jashtme, sado me qëllime të mira, mund të keqinterpretohen dhe të bëjnë dëm.
Osmani i është referuar sidomos deklaratave të Kurtit ku ai kishte vënë në dyshim statusin e gjuhës shqipe si gjuhë zyrtare në Maqedoninë e Veriut, një çështje jashtëzakonisht e ndjeshme për shqiptarët në këtë vend, të cilët kanë luftuar për të drejtat e tyre gjuhësore dhe politike për dekada.
“Në Shkup kjo është vlerësuar si alibi… Ajo na ka prekur sepse na preku në diçka që kanë derdhur gjak shqiptarët e Maqedonisë dhe të Kosovës,” shtoi Osmani, duke theksuar se shqiptarët në Maqedoni nuk presin deklarata publike me tone ofenduese apo nënvlerësuese, por mbështetje reale dhe konstruktive nga Tirana dhe Prishtina.
Në këtë kuadër, ai ka bërë thirrje që Shqipëria dhe Kosova të ndërgjegjësohen për rolin e tyre si përkrahëse dhe mbrojtëse të të drejtave të shqiptarëve në Maqedoninë e Veriut, por duke ruajtur një qasje të matur, që nuk dëmton bashkëjetesën dhe as nuk prodhon tensione të panevojshme në politikën e brendshme të Shkupit.
Deklaratat e Albin Kurtit për gjuhën shqipe në Maqedoninë e Veriut, të cilat në Kosovë ndoshta janë parë si shprehje të interesimit kombëtar, në Shkup janë përjetuar si ndërhyrje në çështjet e brendshme dhe si mohim i arritjeve të shqiptarëve atje. Kjo tregon një ndjeshmëri të thellë politike dhe historike që ekziston mes shqiptarëve në Maqedoni dhe nevojën për qasje shumë më të kujdesshme nga liderët e Kosovës dhe Shqipërisë.
Bujar Osmani, si një nga figurat politike shqiptare më të moderuara në Maqedoni, ka sinjalizuar se retorika nacionaliste, sado që mund të fitojë pikë në opinionin publik të brendshëm në Kosovë, mund të prodhojë efekt të kundërt në rajon dhe të ulë përkrahjen politike brenda vetë Kosovës. Ky është një mesazh i qartë që uniteti kombëtar nuk ndërtohet përmes deklaratave emocionale, por me koordinim të mençur, respekt ndaj realiteteve lokale dhe diplomaci të kujdesshme.