Një tabelë e re rrugore në drejtim të qytetit të Strugës në Maqedoninë e Veriut ka nxitur reagime pasi në të mungon gjuhë shqipe. Fotografia e publikuar nga Bashkimi Demokratik për Integrim (BDI) tregon se mbishkrimet janë vetëm në maqedonisht dhe anglisht, duke i lënë jashtë shqipen – gjuhë që ka status zyrtar në vend sipas ligjit.
Ky zhvillim vjen në një periudhë kur çështja e statusit zyrtar të gjuhës shqipe në Maqedoninë e Veriut po vihet në diskutim të gjerë. Përjashtimi i shqipes nga tabela rrugore interpretohet si një shenjë e qartë e defaktorizimit të shqiptarëve dhe mungesës së respektit për të drejtat e tyre gjuhësore në këtë vend.
Kjo situatë është thelluar edhe nga deklaratat e kryeministrit në detyrë të Kosovës, Albin Kurti, i cili ka mohuar ekzistencën e një ligji të veçantë për përdorimin e shqipes në Maqedoni, duke theksuar se ligji aktual i gjuhëve nuk e njeh shqipen si gjuhë zyrtare. Ky qëndrim është parë si dobësim i kërkesave për barazi dhe njohje të plotë të gjuhës dhe identitetit shqiptar në Maqedoninë e Veriut.
Mungesa e gjuhës shqipe në tabelën rrugore drejt Strugës është më shumë se një gabim teknik – ajo simbolizon sfidën e vazhdueshme të shqiptarëve për njohje dhe respekt të të drejtave të tyre në Maqedoninë e Veriut. Përjashtimi i gjuhës shqipe në hapësira publike është shenjë e një tensioni politik dhe mungese të vullnetit për përfshirje të barabartë.
Deklaratat e Albin Kurtit, si figurë kyçe në politikën shqiptare, që nxisin mohimin e statusit të shqipes, nuk ndihmojnë për të ndërtuar një klimë të mirëbashkimit dhe respektit reciprok mes komuniteteve në rajon. Përkundrazi, ato mund të përdoren nga faktorë politikë në Maqedoni për të legjitimuar përjashtimin dhe diskriminimin.
Për shqiptarët e Maqedonisë së Veriut, çështja e gjuhës është edhe çështje identiteti dhe dinjiteti, ndaj çdo akt që e cenon atë duhet parë si alarm për nevojën e ripërforcimit të angazhimeve për barazi dhe respekt kushtetues.