Elon Musk ka befasuar sërish opinionin publik amerikan, duke shpallur krijimin e partisë së tij politike – “Partia e Amerikës”. Ky vendim erdhi si një reagim i drejtpërdrejtë ndaj një projektligji të mbështetur nga presidenti Donald Trump, që Musk e cilësoi si “kërcënim serioz për ekonominë amerikane”.
Por vetëm një ditë pas këtij njoftimi të bujshëm, ka ardhur edhe reagimi nga Sekretari i Thesarit të SHBA-ve, Scott Bessant. Në një intervistë për CNN, Bessant u shpreh qartë: “Elon Musk duhet të fokusohet në kompanitë e tij, aty ku është më i miri. Bordet drejtuese nuk janë të lumtura me këtë zhvendosje drejt politikës”.
Sipas Bessant, lëvizja e Musk ka shkaktuar shqetësim në qarqet financiare dhe ka vënë në pikëpyetje qëndrueshmërinë e lidershipit të tij në kompani si Tesla dhe SpaceX. Ai theksoi se “parimet që Musk përfaqëson janë të njohura”, por shtoi se bazuar në sondazhet e fundit, ai nuk gëzon mbështetje të gjerë elektorale.
Aksionet e Teslës kanë shënuar një rënie të lehtë prej 0.85% pas këtij lajmi, duke reflektuar shqetësimin e investitorëve për zhvendosjen e fokusit të Musk nga teknologjia drejt politikës.
Analisti financiar Dan Ives nga firma Wedbush tha se kjo lëvizje vjen në një moment të ndjeshëm për kompaninë Tesla. “Lodhja e investitorëve po bëhet gjithnjë e më e dukshme. Ata janë të shqetësuar nga ambiciet politike të Musk dhe nga mungesa e fokusit tek sfidat që ka Tesla,” deklaroi ai.
Ives theksoi gjithashtu se largimi i Musk nga projektet e kriptovalutave si “Doge” ishte parë si një kthim i përqendruar drejt biznesit, por themelimi i një partie politike është një hap që “e ka përmbysur pritshmërinë e tregut”.
Musk dhe Trump dikur shiheshin si aleatë, por ndarja e tyre ka qenë gjithnjë e më e dukshme muajt e fundit. Me themelimin e “Partisë së Amerikës”, duket se Musk po përgatit një sfidë të re në horizontin politik amerikan – ndoshta edhe për vitin 2028.
Hyrja e Elon Musk në politikë është më shumë se një lajm: është një tronditje për Wall Street dhe një sinjal për një epokë të re të përzierjes mes teknologjisë dhe politikës. Reagimi i menjëhershëm nga Sekretari i Thesarit tregon qartë se administrata aktuale është e shqetësuar për ndikimin që një figurë si Musk mund të ketë – jo vetëm në politikë, por edhe në tregjet financiare. Çështja tani është: a do ta ndjekin amerikanët Musk-un në këtë rrugë të re apo do të fillojë rrëshqitja e ndikimit të tij?
Source: CNN