Personazhi i njohur i rrjeteve sociale, Kozak Braçi, ka përfunduar në telashe me ligjin pas një veprimi të papërgjegjshëm që u bë viral në TikTok. Ai është gjobitur nga Policia e Shtetit me 1 milion lekë të vjetra për ndotje të ambientit, pasi u kap duke hedhur mbeturina nga makina e tij.
Ngjarja mori vëmendje publike pasi vetë Kozaku publikoi një video në rrjetet sociale ku shfaqej duke hedhur mbeturina gjatë vozitjes. Kjo video, që u shpërnda gjerësisht, bëri që Forcat e Komisariatit Nr.4 në Tiranë të ndërhynin për ta identifikuar autorin dhe për të vepruar sipas ligjit.
Pas hetimeve të shpejta, policia arriti të konfirmojë se video ishte realizuar disa kohë më parë, por veprimi përbënte shkelje të ligjit për mbrojtjen e mjedisit dhe rregullat e qarkullimit rrugor. Si pasojë, 32-vjeçari Kozaku u gjobit me një shumë të konsiderueshme, ndërsa aktualisht po hetohet në gjendje të lirë.
Policia ka bërë të ditur se ky rast duhet të shërbejë si shembull për të gjithë qytetarët dhe veçanërisht për ata që kanë ndikim në rrjetet sociale. Veprime të tilla jo vetëm që dëmtojnë ambientin, por japin edhe një mesazh të gabuar për publikun.
Institucionet përgjegjëse bëjnë apel që qytetarët të tregojnë kujdes maksimal ndaj mjedisit dhe të respektojnë rregullat, ndërkohë që theksojnë se do të ketë kontrolle të shtuara për parandalimin e ndotjes.