Prishtinë, 26 korrik 2025 –
Sot, në Ditën Përkujtimore të zyrtarëve policorë që ranë në krye të detyrës, u mbajtën homazhe solemne për të kujtuar dhe nderuar jetën e heroit Enver Zymeri, në 14-vjetorin e rënies së tij, si dhe të të gjithë zyrtarëve policorë që u flijuan për sigurinë dhe sovranitetin e Kosovës.
Në këto ceremoni morën pjesë personalitetet më të larta të vendit, përfshirë Kryeministrin Albin Kurti, zëvendëskryeministren dhe ministren e Jashtme Donika Gërvalla-Schwarz, ministrin e Brendshëm Xhelal Sveçla, ministren e Drejtësisë Albulena Haxhiu, ministren e Arsimit Arbërie Nagavci, ministrin e Kulturës Hajrulla Çeku dhe Drejtorin e Policisë, Gazmend Hoxha.
Delegacioni qeveritar nisi homazhet pranë Lapidarit të Policëve të rënë në detyrë në Prishtinë. Më pas, nderimet vazhduan pranë varrit të heroit Afrim Bunjaku, në shenjë mirënjohjeje për sakrificën e tij. Kryeministri Kurti vizitoi gjithashtu familjen Bunjaku, për të shprehur respektin institucional ndaj dhimbjes dhe krenarisë së familjes për birin e tyre.
Aktivitetet përkujtimore vijuan në vendin e rënies së Enver Zymerit në fshatin Varage të Komunës së Zubin Potokut, ku u zhvilluan homazhe pranë lapidarit të ngritur për nder të tij.
Kryeministri Kurti tha se që nga viti 2001 e deri më sot, Kosova ka humbur 24 zyrtarë policorë në krye të detyrës. Ai theksoi se Enver Zymeri dhe Afrim Bunjaku nuk ishin thjesht policë, por heronj që dhanë jetën për ta mbrojtur shtetin.
“Jemi këtu te lapidari i policëve të rënë në detyrë, 24 gjithsej në Kosovën e pasluftës. Dua të theksoj heroin tonë Enver Zymerin dhe po ashtu Afrim Bunjakun që ranë në krye të detyrës duke mbrojtur sovranitetin shtetëror, integritetin territorial, rendin, ligjin, paqen dhe sigurinë në veri të Kosovës”, deklaroi Kurti.
Ai shtoi se kjo ditë është e lidhur ngushtë me kujtimin për rënien heroike të Enver Zymerit më 26 korrik 2011, ditë që ka mbetur në kujtesën kolektive si simbol i sakrificës më të lartë për shtetin.
Kujtimi për Enver Zymerin, Afrim Bunjakun dhe të gjithë policët që dhanë jetën për shtetin e Kosovës mbetet i gjallë dhe na obligon si shoqëri të mbrojmë lirinë dhe drejtësinë për të cilën ata u flijuan.
Kujtesa për heronjtë që ranë në mbrojtje të Kosovës nuk është thjesht ceremoni përkujtimore – ajo është pjesë e moralit kombëtar dhe një pikë e palëkundur referimi për shtetin. Enver Zymeri dhe Afrim Bunjaku nuk janë emra që përmenden vetëm një herë në vit. Ata janë figura të qëndrueshme të sakrificës dhe guximit në historinë moderne të Kosovës.
Për një shtet të ri si Kosova, ku sovraniteti shpesh vihet në sprovë në terrenin e brishtë të veriut, përkushtimi i zyrtarëve policorë është shumë më tepër se detyrë – është mbrojtje aktive e paqes dhe funksionalitetit institucional. Kjo e bën sakrificën e tyre edhe më të thellë dhe të veçantë.
Në një realitet ku provokimet dhe tensionet kufitare mbesin të vazhdueshme, nderimi i përvitshëm për policët e rënë në detyrë është një mesazh i qartë se Republika nuk harron. As familjet e tyre nuk duhet të ndihen të braktisura apo të haruara, sepse vetëm përmes kujtimit të përhershëm dhe mbështetjes së vazhdueshme për ta, sakrifica e heronjve merr kuptim të plotë.