Nënkryetarët e Lidhjes Demokratike të Kosovës, Hykmete Bajrami dhe Lutfi Haziri, së bashku me deputeten Jehona Lushaku, pritën sot në selinë qendrore të partisë të Ngarkuarën me Punë në Ambasadën e Shteteve të Bashkuara në Kosovë, znj. Anu Prattipati.
Takimi u fokusua te zhvillimet e fundit politike, veçanërisht situata e krijuar pas mos-konstituimit të Kuvendit të Kosovës. Përfaqësuesit e LDK-së theksuan se kjo çështje tashmë është dorëzuar për interpretim në Gjykatën Kushtetuese dhe se është jetike që ky institucion të marrë një vendim të drejtë, të bazuar në Kushtetutë dhe në interes të stabilitetit institucional.
LDK ritheksoi se vendi ka nevojë urgjente të dalë nga kriza politike dhe institucionale për të vazhduar rrugën drejt zhvillimit demokratik dhe integrimit euroatlantik. Në këtë drejtim, partia shprehu mirënjohje për mbështetjen e vazhdueshme të Shteteve të Bashkuara në të gjitha fazat e shtetformimit të Kosovës, duke e cilësuar miqësinë me SHBA-të si një shtyllë të pazëvendësueshme të politikës së saj.
Takimi i LDK-së me përfaqësuesen amerikane tregon qartë se kriza politike në Kosovë po shihet jo vetëm si një çështje e brendshme, por edhe si një situatë që kërkon vëmendjen dhe interesimin e partnerëve strategjikë. Shtetet e Bashkuara historikisht kanë luajtur rol kyç në garantimin e stabilitetit institucional në Kosovë, dhe ky takim duket si një sinjal se Uashingtoni po monitoron nga afër zhvillimet.
Nga ana tjetër, insistimi i LDK-së që Gjykata Kushtetuese të japë një vendim të drejtë reflekton pritshmëritë e partive politike për një zgjidhje ligjore, por edhe për një daljen nga bllokada me sa më pak kosto politike. Megjithatë, mbetet për t’u parë nëse ky proces do të përshpejtohet apo do të vazhdojë të mbajë të paralizuar institucionet.