Një banor i Vushtrrisë ka bërë një gjest të veçantë dhe human për bashkëqytetarët e tij, duke vendosur pranë shtëpisë së tij një shportë me kumbulla të freskëta për t’u marrë falas.
Fotografia e postuar në rrjete sociale tregon shportën plot me fruta të stinës dhe një shënim të thjeshtë, por me shumë domethënie:
“Merr sa të duash, por mos e merr gjithë shportën.”
Ky gjest i vogël por i ndjerë ka marrë vlerësime të shumta nga qytetarët, të cilët e kanë cilësuar si shembull frymëzues për të gjithë. Për shumëkënd, kjo është një kujtesë se bujaria dhe kujdesi për të tjerët nuk kërkojnë gjithmonë gjëra të mëdha, por thjesht zemër të mirë.
Ky veprim i banorit të Vushtrrisë është përshëndetur gjerësisht në rrjete sociale, duke nxitur reagime pozitive dhe duke treguar se solidariteti dhe ndihma e ndërsjellë janë ende të gjalla në shoqërinë tonë.