Gazetari Milaim Zeka ka reaguar ashpër ndaj gazetares Jeta Xharra, duke e akuzuar se për vite me radhë ka folur negativisht për Kosovën dhe kolegët e saj nëpër ambasada, vetëm për të përfituar financiarisht. Në një postim në Facebook, Zeka tha se për këto çështje është folur shumë vonë dhe se, sipas tij, këto akuza duhej të adresoheshin në kohën e duhur.
“Sot është vonë. Kur ka qenë koha kam folur vetëm unë. Jeta me BIRN-in nuk kanë lënë të zezë pa folur, sidomos në ambasadat amerikane dhe britanike, kundër Kosovës dhe kolegëve të tyre, vetëm për të vjelë miliona euro e për të dëmtuar lirinë e fjalës”, ka shkruar Zeka.
Ai ka lidhur BIRN-in edhe me propagandën për të ashtuquajturën “shtëpia e verdhë” në Burrel, një pretendim i kontestuar dhe i konsideruar shpifje kundër UÇK-së. “Mos harroni që shpikja më monstruoze për ‘shtëpinë e verdhë’ ka ardhur nga BIRN-i. O besoni që nuk ia vlen as të flitet më…”, shtoi Zeka.
Akuzat ndaj Jeta Xharrës nuk kanë munguar as sot. Kreu i Radio Kosovës, Arsim Halili, ka deklaruar se Xharra dhe organizata BIRN kanë marrë 80 mijë euro nga RTK-ja brenda një dite, përmes një marrëveshjeje për realizimin e dy emisioneve.
Deklaratat e Milaim Zekës kundër Jeta Xharrës dhe BIRN-it shtojnë tensionet mes figurave publike e mediave në Kosovë. Akuzat për përfitime të mëdha financiare dhe propagandë të dëmshme ndaj vendit, nëse mbeten pa verifikim të pavarur, rrezikojnë të thellojnë mosbesimin e publikut ndaj mediave dhe institucioneve.