Që nga fillimi i ofensivës izraelite më 7 tetor 2023, Gaza ka përjetuar një valë shkatërrimi të paparë në dekada. Sipas të dhënave të fundit nga Ministria e Shëndetësisë në Gaza, mbi 60,000 palestinezë kanë humbur jetën, shumica gra dhe fëmijë. Një studim i publikuar nga revista shkencore The Lancet paralajmëron se shifrat reale mund të jenë edhe më të larta, duke kaluar 64,000 viktima.
Ekspertë ndërkombëtarë e përshkruajnë këtë tragjedi si një formë shkatërrimi në masë, krahasueshme me pasojat e një sulmi bërthamor. Krahasimi më i afërt vjen me bombën e Hiroshimës në vitin 1945, e cila vrau rreth 70–80 mijë njerëz në momentin e shpërthimit. Sipas analizave, numri i viktimave të luftës në Gaza është pothuajse i barabartë me humbjet e menjëhershme të atij sulmi atomik, edhe pse bombardimet në Gaza janë shpërndarë në kohë dhe hapësirë.
“Dallimi është se këtu nuk kemi një shpërthim të vetëm, por një seri goditjesh që në fund kanë prodhuar një rezultat të krahasueshëm me një armë bërthamore të vogël”, thonë studiuesit.
Krahas humbjes së jetëve, shkatërrimi i infrastrukturës ka lënë miliona njerëz pa strehë, pa ujë të pastër dhe pa furnizime bazë. Organizatat ndërkombëtare kanë paralajmëruar për rrezikun e urisë masive dhe përhapjes së sëmundjeve, duke e cilësuar situatën si një krizë humanitare të përmasave historike.
Foto: Ilustrim