Kupa e Botës 2026 po afrohet me hapa të shpejtë dhe emocionet e futbollit po rriten kudo në botë. Ky edicion do të jetë i pari me 48 ekipe pjesëmarrëse, duke sjellë një spektakël edhe më të madh dhe më shumë mundësi për kombëtaret që synojnë lavdinë botërore.
Përderisa shumica e përfaqësueseve ende po zhvillojnë ndeshjet kualifikuese në kontinente të ndryshme, një numër kombëtaresh tashmë kanë siguruar vendin e tyre në këtë turne madhështor.
Kombëtaret organizatore:
- Shtetet e Bashkuara
- Meksika
- Kanadaja
Nga Azia:
- Japonia
- Irani
- Uzbekistani
- Jordania
- Koreja e Jugut
- Australia
Nga Oqeania:
- Zelanda e Re
Nga Amerika Latine:
- Argjentina
- Brazili
- Uruguaji
- Kolumbia
- Ekuadori
- Paraguaji
Ky grup prej 16 kombëtaresh janë të parat që kanë siguruar biletën për turneun e vitit 2026. Lista pritet të zgjerohet shpejt, pasi ndeshjet kualifikuese janë ende në zhvillim në Europë, Afrikë dhe rajone të tjera të botës.
Botërori i ardhshëm, i cili do të zhvillohet në SHBA, Meksikë dhe Kanada, pritet të sjellë më shumë surpriza, me skuadra të reja që mund të shfaqen për herë të parë dhe me rikthimin e disa fuqive tradicionale të futbollit botëror.
Kualifikimi i hershëm i disa kombëtareve tregon qartë se rritja e numrit të pjesëmarrësve e ka bërë garën më gjithëpërfshirëse. Shtetet e Azisë dhe Amerikës Latine kanë përfituar më shumë, duke siguruar pjesëmarrjen e disa ekipeve që më parë kishin vështirësi për të kaluar fazat e ngushta.
Për shembull, Uzbekistani dhe Jordania janë dy prej përfaqësueseve që shkruajnë histori, pasi pjesëmarrja e tyre në një Kupë Bote konsiderohet sukses historik. Ndërkohë, gjigantët si Argjentina, Brazili dhe Uruguaji dëshmojnë edhe një herë se kontinenti amerikan mbetet një vatër e fuqishme futbolli.
Nga ana tjetër, Europa, që tradicionalisht ka sjellë fituesit kryesorë të këtij turneu, ende nuk ka kombëtare të kualifikuara, por kjo është e pritshme duke qenë se fazat e eliminatoreve janë ende në zhvillim.
Në aspektin sportiv, zgjerimi i Kupës së Botës pritet të sjellë ndeshje më të balancuara, më shumë surpriza dhe një larmi kulturash futbolli. Për tifozët, kjo është një mundësi për të parë talente të reja, ndërsa për kombëtaret e reja pjesëmarrëse, është një rast i artë për të ndërtuar histori dhe për të fituar përvojë në skenën më të madhe të futbollit.