Gazetari Vullnet Krasniqi ka reaguar lidhur me situatën politike në Drenas, duke theksuar se kjo komunë pas 25 vitesh dominim të një partie politike, ka mundësinë të bëjë ndryshimin në zgjedhjet e ardhshme.
Ai ka theksuar se fakti që Partia Demokratike e Kosovës (PDK) ka pasur gjithmonë të sigurta votat në Drenas, ka ndikuar që qyteti të trajtohet me neglizhencë. Sipas tij, Komuna është përdorur kryesisht për të sistemuar njerëz të partisë në poste të ndryshme, jo mbi bazën e punës apo rëndësisë për qytetarët, por mbi bazën e hierarkisë së brendshme partiake.
Krasniqi përmendi edhe figurën e ish-kryetarit Ramiz Lladrovci, i cili sipas tij, pas përfundimit të mandatit si ambasador në Shqipëri, u vendos në krye të Komunës së Drenasit si pjesë e një kompromisi të brendshëm politik brenda PDK-së. Ai kritikoi mungesën e përgjegjësisë së kësaj partie për një qytet që ndodhet vetëm 10 minuta larg kryeqytetit, por që sipas tij, për 20 vite ka pësuar shumë pak zhvillim.
Në shënimin e tij, gazetari përmendi disa probleme konkrete, si:
- Qendra tregtare që përmbytet sa herë bie shi.
- Feronikeli, që sipas tij, nuk i solli qytetit përfitime, por vetëm probleme.
- Migrimi i banorëve drejt Fushë Kosovës, për shkak të mungesës së kushteve më të mira në fshatra dhe qytet.
Duke folur për zgjedhjet e radhës, Krasniqi shtoi se pas largimit të Lladrovcit nga skena, tani PDK po mundohet të promovojë kandidatin Petrit Hajdari, i cilësuar si “më i votuari për deputet” apo si “njeri i pranueshëm” për strukturat e tjera partiake.
“Qytetarët e Drenasit nuk duhet ta pranojnë këtë qasje inferiore ndaj tyre. Nuk ka rëndësi a votohet Ramizi apo Egzona, rëndësi ka që PDK të marrë një mesazh të qartë: vota nuk është e garantuar, ajo duhet fituar me punë e me projekte. Një ndryshim i tillë do të ishte fitore e madhe për emancipimin politik në Drenas dhe në gjithë Kosovën,” shkroi Krasniqi.
Reagimi i gazetarit Vullnet Krasniqi pasqyron një lodhje të dukshme të opinionit publik nga dominimi i gjatë i një partie të vetme në një komunë si Drenasi. Ky fenomen nuk është i izoluar vetëm këtu, por është shembull tipik i mënyrës se si funksionon patronazhi politik në shumë komuna të Kosovës: votat e sigurta shpeshherë prodhojnë mungesë përgjegjësie dhe stagnim zhvillimor.
Në rastin konkret, Drenasi është vetëm pak minuta larg kryeqytetit, por niveli i zhvillimit urban dhe ekonomik nuk reflekton këtë afërsi. Emigrimi i brendshëm i banorëve drejt qyteteve të tjera tregon se mungesa e politikave afatgjata ka sjellë zbrazjen e fshatrave dhe ngecjen e vetë qytetit.
Nëse zgjedhjet e ardhshme do të sjellin një rezultat ndryshe nga pritjet tradicionale, kjo nuk do të ishte vetëm rotacion politik, por një test i emancipimit qytetar: votuesit duke kërkuar llogaridhënie dhe jo duke dhënë votën si një automatizëm partiak. Një vendim i tillë në Drenas do të shërbente si precedent i rëndësishëm për të gjithë Kosovën, duke dërguar sinjal të qartë se qytetarët nuk janë më “pronë” e asnjë partie, por aktorë të barabartë në lojën politike.