Prishtinë, 30 shtator 2025 – Sot është nënshkruar një marrëveshje e rëndësishme bashkëpunimi mes Agjencisë së Ushqimit dhe Veterinarisë së Kosovës (AUV) dhe Ministrisë së Bujqësisë, Pylltarisë dhe Peshkimit të Republikës së Kroacisë. Dokumenti u nënshkrua nga drejtori i AUV-së, z. Bekim Hoxha, dhe sekretari i Shtetit të Kroacisë, z. Tugomir Majdak, duke shënuar një hap të madh drejt forcimit të marrëdhënieve bilaterale në fushën e sigurisë ushqimore dhe shëndetit veterinar.
Drejtori Hoxha theksoi se marrëveshja përfaqëson një hap konkret për afrimin e Kosovës me standardet evropiane në këto fusha, ndërsa Majdak shprehu gatishmërinë e Kroacisë për bashkëpunim afatgjatë e të ngushtë me Kosovën. Ai u vlerësua si një mik i madh i vendit, duke qenë i angazhuar në mbështetjen e integrimit të AUV-së në organizata ndërkombëtare.
Marrëveshja parasheh disa objektiva kryesore, përfshirë: vendosjen e bashkëpunimit të drejtpërdrejtë mes institucioneve përkatëse, shkëmbimin e përvojave dhe ekspertizës teknike, organizimin e vizitave studimore dhe trajnimeve për zyrtarët dhe profesionistët e fushës, si dhe bashkëpunimin në kërkime shkencore për rritjen e sigurisë ushqimore dhe mbrojtjen e shëndetit të kafshëve.
Gjithashtu, format e bashkëpunimit përfshijnë projekte të përbashkëta në shëndetin e kafshëve dhe sigurinë ushqimore, bashkëpunim teknik mes laboratorëve veterinarë të të dyja vendeve, shkëmbim informacioni mbi qasjen në treg dhe procedurat e importit, si dhe pjesëmarrje të përbashkët në projekte të financuara nga BE-ja, përfshirë IPA.
Në takim morën pjesë gjithashtu znj. Irena Georgievski, Udhëheqëse e Politikave Bujqësore, BE-së dhe Bashkëpunimit Ndërkombëtar, si dhe znj. Petra Badovinac, Udhëheqëse për Bashkëpunim Ndërkombëtar.
Marrëveshja Kosovë–Kroaci përfaqëson një hap të dukshëm në forcimin e diplomacisë teknike dhe bashkëpunimit rajonal. Për Kosovën, ky është një mekanizëm i vlefshëm për të harmonizuar standardet e sigurisë ushqimore dhe shëndetit veterinar me ato të Bashkimit Evropian, duke qenë se këto fusha përbëjnë një pjesë të rëndësishme të procesit të integrimit evropian.
Nga ana tjetër, Kroacia, si një vend anëtar i BE-së, ofron përvojë të drejtpërdrejtë në kalimin e sfidave të përafrimit me acquis communautaire, duke e bërë këtë bashkëpunim edhe më të rëndësishëm. Investimi në trajnime, projekte të përbashkëta dhe shkëmbime profesionale jo vetëm që do të përmirësojnë kapacitetet institucionale të Kosovës, por do të krijojnë edhe hapësira për projekte të financuara nga BE-ja që sjellin ndikim afatgjatë.
Ky bashkëpunim tregon se diplomacia teknike dhe shkencore po bëhet një nga mjetet më efektive për fuqizimin e pozitës ndërkombëtare të Kosovës dhe për përgatitjen e saj drejt integrimit evropian.