Në zemër të kryeqytetit, po vijojnë me intensitet punimet restauruese në Xhaminë “Sudi Efendi” në Prishtinë — një nga monumentet me vlera të veçanta historike, arkitekturore, artistike dhe shpirtërore të trashëgimisë kulturore të vendit.
Punimet po zhvillohen nën kujdesin e Ministrisë së Kulturës, Rinisë dhe Sportit (MKRS), e cila ka theksuar përkushtimin për ruajtjen dhe mbrojtjen e monumenteve me rëndësi të veçantë kulturore e fetare.
Xhamia “Sudi Efendi”, e njohur për arkitekturën karakteristike osmane, për elementet e saj prej druri të gdhendur me mjeshtëri, si dhe për vlerat shpirtërore që mbart, është një nga simbolet e identitetit kulturor të Prishtinës.
Ky projekt i MKRS-së synon restaurimin e plotë dhe ruajtjen e autenticitetit të objektit, në mënyrë që brezat e ardhshëm të mund ta njohin dhe ta vlerësojnë trashëgiminë e tyre historike.