Ngjarja tragjike që tronditi Malishevën, ku Astrit Isufi vrau dy vëllezërit e bashkëshortes së tij, po merr përmasa edhe më të rënda pas publikimit të detajeve të reja për dhunën e vazhdueshme në familje që i kishte paraprirë krimit.
Sipas burimeve të afërta me rastin, Astrit Isufi ushtronte dhunë sistematike ndaj bashkëshortes së tij, motrës së dy viktimave. Ai e kishte kërcënuar prej kohësh, duke i thënë:
“S’guxon me u nda prej meje se ta vras familjen.”
Pas një sërë mosmarrëveshjesh, ajo ishte kthyer në shtëpinë e familjes së saj në Malishevë, ndërsa ditën e djeshme, Astrit Isufi kishte shkuar për ta marrë me forcë. Ngjarja përfundoi në tragjedi, kur ai qëlloi për vdekje dy vëllezërit e saj, Driton dhe Naim Morina, para shtëpisë së tyre.
Policia e Kosovës e arrestoi autorin në orët e para të mëngjesit të sotëm, pasi ai ishte plagosur lehtë. Hetimet janë në vazhdim për të zbardhur plotësisht motivet e kësaj ngjarjeje që ka tronditur opinionin publik.
Organizatat që merren me mbrojtjen e grave kanë reaguar ashpër ndaj rastit, duke kërkuar masa më të forta kundër dhunës në familje dhe mekanizma mbrojtës efektivë për gratë që denoncojnë dhunën.