Në ditën e zgjedhjeve lokale, kandidati dhe aktivisti Alim Rama ka bërë një denoncim publik që ka shkaktuar debat në opinionin politik. Ai ka publikuar disa raporte mjekësore për të cilat pretendon se janë përdorur për të autorizuar votime me asistencë, në vend që të kenë funksionin e tyre ligjor e shëndetësor.
Në postimin e tij, Rama shkruan:
“Kur mjekët e LDK-së në Prishtinë dhe të PDK-së në Kaçanik e marrin rolin e noterit e shpërndajnë vërtetime mjekësore për të autorizuar votime me asistencë ose përndryshe blerje e votës me letra.”
Në dokumentet e publikuara, të cilat janë të lëshuara nga qendrat mjekësore familjare, në rubrikat “Diagnoza” dhe “Terapia” nuk ka shënime mjekësore, por tekste që përmendin autorizim për votim dhe arsye si “nuk din shkrim lexim”.
Sipas Ramës, këto raporte po përdoren si justifikime për votime të asistuara, çka bie ndesh me rregullat e procesit zgjedhor dhe me etikën profesionale të mjekëve.
Në rrjete sociale, publikimi i dokumenteve ka shkaktuar reagime të shumta. Disa qytetarë kërkojnë hetim të menjëhershëm nga Komisioni Qendror i Zgjedhjeve dhe Ministria e Shëndetësisë, ndërsa të tjerë theksojnë se këto praktika minojnë besimin në procesin demokratik.
Derisa institucionet përkatëse nuk kanë reaguar ende, ky denoncim e ka zhvendosur vëmendjen nga gara elektorale te mënyra se si përdoren dokumentet publike për qëllime politike.
Ky rast ngre një çështje të rëndësishme për integritetin e institucioneve publike në Kosovë. Raportet mjekësore janë dokumente ligjore që duhet të përdoren vetëm për arsye shëndetësore, por kur ato hyjnë në fushën politike, rrezikohet jo vetëm procesi zgjedhor, por edhe besimi në sistemin shëndetësor.
Nëse vërtetohet se janë lëshuar për qëllime politike, kjo do të përbënte një shkelje të rëndë etike dhe ligjore. Për më tepër, përdorimi i arsyeve si “nuk din shkrim lexim” për të justifikuar votim të asistuar, mund të krijojë hapësirë për manipulim të rezultatit zgjedhor.
Ky është një sinjal alarmi që tregon se procesi demokratik nuk mund të mbrohet vetëm me ligje, por kërkon edhe integritet moral nga profesionistët që janë pjesë e tij.