Deklaratat e fundit të Eugen Cakolli kanë hapur një debat të fortë për pasojat që mund të sjellë vonesa e shpalljes së datës së zgjedhjeve nga Presidentja e vendit. Sipas tij, çdo ditë që kalon pa një vendim konkret, e tkurr hapësirën ligjore dhe rrit pasiguritë për funksionimin normal të institucioneve në vitin e ardhshëm.
Cakolli thekson se afatet kushtetuese dhe ato të Ligjit për Zgjedhjet nuk janë plotësisht të sinkronizuara, gjë që e bën edhe më delikate llogaritjen e datave të mundshme. Aktualisht, skenarët realë për mbajtjen e zgjedhjeve të parakohshme mbeten 21 dhe 28 dhjetori. Por gjithçka mund të ndryshojë shpejt nëse konsultimet formale shtyhen edhe pak ditë të tjera.
Sipas tij, çdo lëvizje pas datës 22 nëntor e eliminon automatikisht mundësinë e 21 dhjetorit, duke e shtyrë procesin drejt muajit janar. E pikërisisht janari shihet si periudha më problematike, sepse rregullat buxhetore parashikojnë zgjatje automatike të buxhetit vetëm për muajin e parë të vitit – jo për shkurtin. Kjo do të thotë se institucionet mund të përballen me kufizime serioze financiare nëse zgjedhjet nuk përmbyllen brenda këtij viti.
Sipas analizës së Cakollit, mbajtja e zgjedhjeve brenda dhjetorit është e vetmja mënyrë për të shmangur një zinxhir krizash të mundshme – nga ato kushtetuese e deri tek ato fiskale. Zgjedhjet e hershme në dhjetor, sipas tij, i japin kohë të mjaftueshme institucioneve të reja që të formohen deri në ditët e para të marsit, duke shmangur presionin e madh kohor.
Ai paralajmëron se shtyrja e mëtejshme e vendimit presidencial vetëm sa e shtyn vendin më afër një situate të pasigurt, ku rreziku kushtetues dhe ai politik rritet në të njëjtën masë. Për këtë arsye, thotë Cakolli, “çdo ditë vonesë e çon Kosovën më afër skajit të afateve, me pasoja që askush nuk i dëshiron”.
Kjo deklaratë ka rikthyer në qendër të vëmendjes pritjet për veprimin e radhës të Presidentes, i cili po shihet si vendim kyç për mbarëvajtjen e vitit të ardhshëm institucional.
Burimi: Deklarata e Eugen Cakollit