Prishtinë, 20 nëntor 2025 – Kryeministri në detyrë i Kosovës, Albin Kurti, priti sot në takim Kryetarin e Bashkisë Hora e Arbëreshëve, Rosario Petta, duke vënë në qendër të diskutimeve zgjerimin e bashkëpunimit kulturor dhe promovimin e trashëgimisë arbëreshe.
Në prani të zëvendësministrës Liza Gashi, Kurti theksoi rëndësinë e thellimit të lidhjeve me komunitetin arbëresh si pjesë e historisë dhe identitetit të përbashkët shqiptar. “Qeveria e Kosovës është e angazhuar për të mbështetur iniciativat që ruajnë dhe promovojnë kulturën arbëreshe, duke e bërë atë një urë lidhëse midis komuniteteve tona,” tha kryeministri.
Diskutimet përqendruan tek rritja e shkëmbimeve kulturore dhe akademike, përfshirë mundësinë e përfshirjes së Kosovës në festivalet e filmit në Kalabri dhe Sicili. Një fokus tjetër ishte integrimi i komunitetit arbëresh në programin veror “Shijo Kosovën”, për të njohur më mirë vendin dhe për të forcuar lidhjet kulturore.
Të dy bashkëbiseduesit u pajtuan gjithashtu mbi nismën për të ndërtuar një shtatore të Komandantit Legjendar, Adem Jashari, në Bashkinë Hora e Arbëreshëve, si simbol i identitetit dhe respektit të përbashkët. Po ashtu u diskutua për zhvillimin e projekteve akademike të përbashkëta, shkëmbime studentore dhe mbështetjen e mësimit të gjuhës arbëreshe.
Ky takim shënon një hap të rëndësishëm drejt thellimit të bashkëpunimit ndërkulturor dhe akademik mes Kosovës dhe komunitetit arbëresh, duke forcuar urat historike dhe kulturore mes dy popujve.