Në kuadër të ministerialit SHBA – Karta e Adriatikut (A5), ministri në detyrë i Mbrojtjes, Ejup Maqedonci, ka zhvilluar një takim bilateral me ministrin e Mbrojtjes së Bosnjës dhe Hercegovinës, Zukan Helez. Diskutimet u fokusuan në zgjerimin e bashkëpunimit mes dy ministrive dhe forcave të armatosura, me theks të veçantë te rritja e kapaciteteve të përbashkëta dhe shkëmbimi profesional.
Të dy ministrat nënvizuan se bashkëpunimi rajonal mbetet një prej shtyllave kryesore për garantimin e sigurisë afatgjatë dhe stabilitetit në rajon. Ata theksuan se situata e sigurisë në Ballkan kërkon koordinim të vazhdueshëm dhe krijimin e hapësirave të reja për veprime të përbashkëta, ushtrime stërvitore dhe projekte të mbështetura nga partnerët ndërkombëtarë.
Takimi u vlerësua si një hap tjetër drejt forcimit të marrëdhënieve dypalëshe dhe avancimit të rolit të dy vendeve brenda iniciativave të sigurisë në kuadër të Kartës së Adriatikut.