Pas publikimit të rezultateve zgjedhore, Qeqa Krelani ka reaguar me një postim të ashpër në rrjetet sociale, duke theksuar se përsëritja e të njëjtit rezultat zgjedhor nuk është shenjë e hutimit apo mashtrimit të qytetarëve, por dëshmi e një vullneti të qartë dhe të qëndrueshëm politik.
Sipas Krelanit, fakti që një popull mobilizohet tri herë brenda një viti për të votuar dhe tri herë jep të njëjtin verdikt, tregon se qytetarët janë të vetëdijshëm për zgjedhjen e tyre dhe se e mbështesin mënyrën se si po qeverisen. Ajo thekson se vota e përsëritur nuk kërkon debate të pafundme, por respekt institucional dhe publik.
“Populli nuk po kërkon udhëzim. Po jep urdhër. Nuk po kërkon mendime. Po jep vendim”, shprehet Krelani, duke e cilësuar votën si një akt përfundimtar që nuk ka nevojë për interpretim nga studio televizive apo panele politike.
Në reagimin e saj, ajo kritikon ashpër një pjesë të analistëve politikë, të cilët – sipas saj – e pranojnë demokracinë vetëm atëherë kur rezultatet përputhen me bindjet e tyre personale. Në momentin kur verdikti i qytetarëve nuk u pëlqen, ata, sipas Krelanit, tentojnë ta relativizojnë ose ta fyejnë votën.
Ajo nënvizon se vota nuk është spektakël televiziv, as debat paneli dhe as “bast politik”, por një vendim i qartë i marrë në kutinë e votimit. “Demokracia nuk deshton kur populli voton njësoj. Ajo deshton kur analistët nuk e durojnë rezultatin dhe tentojnë të flasin në emër të popullit”, shkruan Krelani.
Në përfundim, ajo thekson se qytetarët kanë treguar edhe për herë të tretë se nuk negociojnë me analistë politikë dhe nuk e matin vendimin e tyre me analizat televizive, por me bindjen e tyre personale për drejtimin që duan t’i japin vendit.
Postimi i Qeqa Krelanit ka ngjallur reagime të shumta në rrjete sociale, duke hapur sërish debatin mbi rolin e analistëve politikë dhe respektimin e verdiktit të votës në një shoqëri demokratike.