Komandantja e Përgjithshme e Veteranëve Amerikanë, Carol Whitmore, së bashku me Ryan Gallucci, Drejtor Ekzekutiv të Zyrës së kësaj organizate në Uashington, ka zhvilluar sot një vizitë të rëndësishme në Kosovë, duke u takuar me përfaqësuesit e Organizatës së Veteranëve të Luftës së UÇK-së (OVL UÇK).
Gjatë takimit, diskutimet u përqendruan në thellimin e bashkëpunimit ndërmjet veteranëve nga Shtetet e Bashkuara dhe ata nga Kosova, si dhe në rëndësinë e rolit të veteranëve në ruajtjen e vlerave të lirisë, demokracisë dhe paqes në rajon.
Në një ceremoni të zhvilluar pas takimit, kryetari i OVL UÇK-së, Hysni Gucati, i dorëzoi Whitmore një mirënjohje në shenjë falënderimi për angazhimin e saj dhe mbështetjen e organizatës amerikane ndaj Kosovës dhe veteranëve të saj.
Sipas njoftimit zyrtar, eventi u zhvillua në një frymë respekti dhe miqësie të ndërsjellë, duke theksuar lidhjet e forta mes komunitetit të veteranëve kosovarë dhe atyre amerikanë. Gjatë bisedimeve u riafirmua edhe njëherë vlera e ndarë e përvojës së përbashkët në shërbim të paqes dhe stabilitetit, si dhe rëndësia e mbajtjes së kontakteve të qëndrueshme për të ardhmen.
Ky takim vjen në një kohë kur bashkëpunimi ndërkombëtar në fushën e veteranëve dhe kujtesës historike konsiderohet një element kyç i forcimit të marrëdhënieve mes vendeve dhe i respektimit të kontributeve të atyre që sakrifikuan për lirinë dhe pavarësinë