Kryetari i Prishtinës, Perparim Rama, njoftoi se sot transporti publik në kryeqytet do të ofrohet pa pagesë, si një shenjë përkrahjeje për marshin qytetar “Drejtësi, jo politikë”. Ky vendim synon të lehtësojë lëvizjen e qytetarëve dhe të sigurojë pjesëmarrje sa më të madhe në aktivitetin qytetar.
“Prishtina ju mirëpret dhe jemi të përkushtuar të ofrojmë kushte sa më të mira për qytetarët tanë që duan të marrin pjesë në marsh. Transporti publik falas sot është një mundësi për të ndihmuar pjesëmarrjen aktive dhe qytetare,” tha Kryetari Rama.
Ky hap tregon përkushtimin e institucionit të kryeqytetit për të mbështetur veprimtaritë qytetare dhe për të krijuar mundësi për pjesëmarrje të lirë dhe të sigurt të qytetarëve në ngjarje me rëndësi sociale dhe politike.