PRISHTINË – Kriza institucionale në Kosovë po hyn në një fazë të re pas dështimit të 30-të radhazi për konstituimin e Kuvendit të Kosovës. Përplasjet mes partive politike për emrin e kryetarit të Kuvendit po e mbajnë të paralizuar jetën parlamentare në vend, ndërkohë që Presidentja Vjosa Osmani po përgatitet të ndërmarrë hapa kushtetues.
Burime nga Presidenca kanë konfirmuar për Televizionin Klan se ekipi ligjor i Presidentes tashmë ka hartuar një kërkesë të gatshme për Gjykatën Kushtetuese, por janë në pritje të një aktgjykimi të mëhershëm që mund të ndikojë në pranueshmërinë e kërkesës së tyre.
“Ekipi ligjor i presidentes ka përgatitur një kërkesë për Gjykatën Kushtetuese, mirëpo jemi në pritje të aktgjykimit të kërkesës së AAK-së, sepse ai mund të sqarojë edhe çështjet e pranueshmërisë që do të referohen nga Presidentja,” deklaroi këshilltari presidencial, Bekim Kupina.
Ndërkohë, Presidentja Osmani është shprehur e hapur për konsultime me liderët e partive politike, me synimin për të gjetur një zgjidhje që do t’i jepte fund bllokadës. “Presidentja është e gatshme të zhvillojë takime të veçanta me secilin prej tyre. Ftesa mbetet e hapur, nëse liderët e partive kanë interes për konsultime shtesë”, theksoi Kupina.
Në thelb të krizës është ngërçi për postin e Kryeparlamentarit. Lëvizja Vetëvendosje refuzon të tërheqë kandidaturën e Albulena Haxhiut, ndërsa PDK dhe AAK kërkojnë një emër tjetër që do të mund të bashkonte spektrin politik.
Në përpjekje për të zhbllokuar situatën, LDK ka paralajmëruar një propozim me 15 pika për krijimin e një qeverie unifikuese deri në mars të vitit të ardhshëm. Ky plan synon të krijojë një qeverisje kalimtare për të shmangur zgjedhje të reja dhe për të adresuar sfidat urgjente të vendit.
Megjithatë, me vazhdimin e dështimeve në Kuvend dhe mungesën e kompromisit mes partive, duket se rruga drejt një zgjidhjeje mbetet e pasigurt – ndërkohë që sytë po i drejtohen Gjykatës Kushtetuese si arbitri i fundit institucional.