Deputeti i Lidhjes Demokratike të Kosovës, Arben Gashi, ka publikuar një reagim të fortë lidhur me zhvillimet më të fundit politike në vend, duke kritikuar kontradiktat e përsëritura të pushtetit dhe ndikimin që ato kanë sjellë për stabilitetin e Kosovës.
Në reagimin e tij, Gashi shprehet:
“Për tetë muaj me radhë, vendit iu tha: Ta votojnë Kryetarin e Kuvendit, sepse votat për qeverinë i kemi.
Por kur erdhi momenti për Qeverinë Kurti 3 dhe dështoi, papritur dolën me tjetrën: S’i kemi votat, duam zgjedhje.
Pas pak ditësh, u kthyen prapë: I kemi votat, por vetëm për Konjufcën. S’duam koalicion, s’duam marrëveshje.
Dhe kur dështoi Konjufca, fajin e kërkuan tek të tjerët.”
Sipas deputetit të LDK-së, kjo qasje po prodhon një realitet politik të paqëndrueshëm. Ai shton në reagimin e tij:
“E qysh munden me qenë krejt këto të vërteta njëkohësisht? Qysh mund të ndërtohet vendi mbi kontradikta, lojëra force dhe rrëfime që ndryshojnë çdo javë?”
Në këtë pjesë Gashi adreson drejtpërdrejt pasojat që sipas tij tashmë janë evidente në vend:
“Pasojat i dimë të gjithë: qindra milionë euro të humbura nga donacionet e marrëveshjet ndërkombëtare; sanksione politike e ekonomike që po na mbajnë peng gati tre vite; një ekonomi e ngadalësuar dhe një perspektivë që dita-ditës errësohet.”
Këto komente vijnë në një moment kur vendi po futet gradualisht drejt një fushate zgjedhore të tensionuar, ndërsa partitë politike po përpiqen të pozicionohen për zgjedhjet e parakohshme që pritet të mbahen në muajt në vazhdim. Deklaratat e Gashit janë në linjë me qëndrimet e LDK-së për nevojën e një qeverisjeje të qëndrueshme dhe rikthimin e besimit institucional.
Duke vijuar kritikën, ai thotë:
“Tani duket se po futemi përsëri në një fushatë të polarizuar, pa reflektim, pa mësim nga gabimet, me të njëjtën logjikë të rrezikshme: ose i fitojmë të gjitha, ose i humbim të gjitha. Por e dimë të gjithë se as historia, as politika e një vendi nuk ndërtohen me zero-sum.”
Në këtë linjë, Gashi nënvizon se vendi ka nevojë për kthim në normalitet dhe stabilitet institucional, duke shtuar:
“Ka nevojë për zgjedhje që i japin fund kaosit, jo që e thellojnë atë. Zgjedhje që sjellin stabilitet, besim, dhe një qeverisje që flet me veprime, jo me premtime të nesërme që mohohen të pasnesërmen.”
Me këtë reagim, deputeti i LDK-së synon të shpalosë një thirrje për reflektim politik para hyrjes së vendit në një cikël të ri zgjedhor. Mesazhi final i tij është i qartë:
“Le t’i hyjmë kësaj fushate me mendje të kthjellët e me energji për ta kthyer vendin në normalitet. Sepse Kosova meriton më shumë se improvizime politike, meriton drejtim të qartë dhe përgjegjësi të vërtetë.”
Kjo deklaratë pritet të jetë vetëm njëra ndër shumë zërave politikë që do të dominojnë debatin publik në javët në vijim, ndërsa partitë po përgatiten për një fushatë që duket se do të jetë vendimtare për drejtimin e ardhshëm të vendit.