Sokol Havolli nga Lidhja Demokratike e Kosovës (LDK) ka deklaruar se partia e tij nuk do të ketë votë për rizgjedhjen e Vjosa Osmanit si president të Kosovës.
“Zgjedhja e presidentit kërkon konsensus politik. Osmani e ka pasur mbështetjen para pesë vjetësh nga LDK-ja, me dakordimin e përgjithshëm politik se do të përfaqësonte unitetin e vendit, por ne e dimë që ajo ka përfaqësuar më shumë interesat e LVV-së. Në rrethanat ku jemi, nuk ndjejmë asnjë detyrim që ta votojmë. Nëse VV do të çojë Kosovën në zgjedhje edhe një herë për karrigen e Vjosa Osmanit, kjo nuk është përgjegjësi e LDK-së, por e VV-së,” tha Havolli në emisionin “Interaktiv”.
Havolli gjithashtu theksoi se LDK-ja nuk e ka pritur rezultatin e zgjedhjeve të 28 dhjetorit, por kjo nuk e ka shuar ambicien e partisë për t’u rikthyer si forcë e parë në vend. “LDK-ja asnjëherë nuk e shuan ambicien për t’u rikthyer si parti e parë dhe punon me program serioz për këtë,” shtoi ai.
Pas njoftimit të kryetarit të LDK-së, Lumir Abdixhiku, për dorëheqje, Havolli ka deklaruar se Abdixhiku nuk duhet të largohet nga pozita që mban aktualisht. Ai shtoi gjithashtu se LDK-ja nuk bashkëpunon me PDK-në dhe LVV-në, duke theksuar rivalitetin politik me këto dy parti.
Deklaratat e Havollit tregojnë qartë qëndrimin e LDK-së lidhur me rizgjedhjen e presidentes Osmani dhe theksojnë ambicien e partisë për të rifituar pozicionin e parë në vend, ndërkohë që ruhet distanca politike me partitë tjera kryesore.