Qytetarët e Kosovës vërshojnë drejt bregdetit shqiptar – Ja sa persona kaluan kufirin brenda vetëm 4 orëve
Fundjava ka sjellë një fluks të jashtëzakonshëm të qytetarëve të Kosovës drejt bregdetit shqiptar, ku mijëra familje kanë zgjedhur të kalojnë ditët e pushimit pranë detit.
Sipas të dhënave të publikuara nga autoritetet kufitare, brenda vetëm katër orëve në Shqipëri kanë hyrë gjithsej 11.735 qytetarë, të cilët kanë udhëtuar me 2.740 automjete.
Në pikat kufitare janë krijuar kolona të gjata automjetesh, ndërsa autoritetet kanë angazhuar personel shtesë për të përballuar fluksin e lartë dhe për të përshpejtuar procedurat e kalimit.
Ashtu si çdo sezon veror, destinacionet më të preferuara të pushuesve nga Kosova mbeten Shëngjini, Velipoja, Durrësi, Golemi, Vlora, Himara, Dhërmiu dhe Ksamili, të cilat gjatë fundjavave regjistrojnë numrin më të madh të vizitorëve.
Temperaturat e larta dhe moti me diell kanë bërë që shumë qytetarë të nisen që në orët e para të mëngjesit drejt bregdetit, duke sjellë një rritje të ndjeshme të qarkullimit në rrugët që lidhin Kosovën me Shqipërinë.
Autoritetet u bëjnë thirrje drejtuesve të automjeteve të respektojnë rregullat e trafikut, të tregojnë kujdes gjatë udhëtimit dhe të kenë durim për shkak të fluksit të madh të lëvizjeve në këtë fundjavë.