Vëllai i Gjyljeta Ukellës pas vendimit të Supremes: “Nga ky moment heqim dorë nga drejtësia e Kosovës”
Një reagim i fortë ka ardhur nga familja e Gjyljeta Ukellës, menjëherë pasi Gjykata Supreme e Kosovës vendosi ta ndryshojë dënimin ndaj Edmond Lajçit, duke e zëvendësuar burgimin e përjetshëm me 30 vjet burgim.
I revoltuar nga ky vendim, Shpat Ukella, vëllai i së ndjerës, deklaroi se familja nuk ka më besim në sistemin e drejtësisë në Kosovë.
“Nuk deklarohemi më për media. Prej këtij momenti, heqim dorë nga drejtësia.”
Kjo ishte deklarata e shkurtër, por shumë e fortë e Shpat Ukellës, e cila u bë publike menjëherë pas shpalljes së vendimit të Gjykatës Supreme.
Rasti i vrasjes së Gjyljeta Ukellës ishte një nga rastet që tronditi opinionin publik në Kosovë. Sipas aktakuzës, më 16 prill 2024, Edmond Lajçi dyshohet se e privoi nga jeta bashkëshorten e tij në banesën e tyre në Pejë, duke e qëlluar me armë zjarri në kokë. Pas ngjarjes, ai ishte larguar nga vendi i krimit dhe më pas ishte paraqitur vetë në stacionin policor, ku kishte njoftuar autoritetet për atë që kishte ndodhur.
Fillimisht, Gjykata Themelore në Pejë e kishte dënuar Lajçin me burgim të përjetshëm, ndërsa ky vendim ishte mbështetur edhe nga pala e dëmtuar, e cila kishte kërkuar që dënimi maksimal të mbetej në fuqi.
Megjithatë, me vendimin e fundit, Gjykata Supreme e ndryshoi masën e dënimit duke e dënuar Edmond Lajçin me 30 vjet burgim, vendim që ka shkaktuar reagime të shumta dhe pakënaqësi te familjarët e viktimës.
Deklarata e Shpat Ukellës është interpretuar si një shprehje e humbjes së besimit të familjes në institucionet e drejtësisë, pas vendimit që ndryshoi dënimin e shqiptuar më parë.
Rasti vazhdon të mbetet një nga ngjarjet më të ndjeshme të viteve të fundit në Kosovë, ndërsa vendimi i Supremes ka rikthyer debatet publike mbi politikën e dënimeve për rastet e vrasjeve të grave dhe dhunës në familje.