Një tjetër kapitull i lavdishëm i është shtuar historisë së Forcës së Sigurisë së Kosovës. Nënoficeri Qendrim Berisha ka përfaqësuar me krenari shtetin e Kosovës në një nga programet më të avancuara të trajnimit ushtarak në botë – Kursin Ndërkombëtar për Teknik të Municioneve në Mbretërinë e Bashkuar.
Përveç përfundimit me sukses të jashtëzakonshëm të kursit, Berisha është nderuar me çmimin më të lartë “Comera Cup”, si kursanti më i mirë ndërkombëtar, duke lënë pas kolegë nga vende me përvojë shumëvjeçare si Gana, Estonia dhe Kuvajti.
Kursi, i cili ndahet në tri module thelbësore, ka përgatitur pjesëmarrësit me njohuri të avancuara:
- Moduli i parë përfshin aspektet kimike dhe teknike të municioneve – nga përbërja e tyre, identifikimi, prodhimi, njohja me kalibra të ndryshëm, mortaja dhe raketa anti-tank si Javelin dhe NLAW.
- Moduli i dytë fokusohet në ndërtimin dhe menaxhimin e depove të municioneve, sipas standardeve dhe doktrinave ndërkombëtare, përfshirë transportin ndërkufitar.
- Moduli i tretë është praktik dhe teorik, i përqendruar në asgjësimin e sigurt të municioneve.
Përfundimi me sukses i këtij kursi dhe vlerësimi i Berishës si më i miri tregon jo vetëm cilësinë në rritje të FSK-së, por edhe angazhimin e saj për të qenë forcë moderne dhe profesionale në standardet më të larta ndërkombëtare.
Ky sukses dëshmon një tendencë të qartë: Forca e Sigurisë së Kosovës po përgatit kuadro me cilësi ndërkombëtare, të aftë të përballojnë çdo sfidë teknike dhe operacionale. Nënoficerë si Qendrim Berisha janë dëshmi e fuqizimit të institucioneve të sigurisë dhe ngritjes së reputacionit të Kosovës në skenën globale. Ky është një sinjal pozitiv për aleatët ndërkombëtarë dhe një motivim për të rinjtë që synojnë karrierë ushtarake në FSK.