Ferizaj, 7 korrik 2025 – Prokuroria Themelore në Ferizaj ka ngritur aktakuzë ndaj dy personave me inicialet E.S. dhe V.H. për trafikim me njerëz dhe frikësim gjatë procedurës penale, me viktima vajza të mitura që shfrytëzoheshin seksualisht në këmbim të pagesave që shkonin nga 50 deri në 400 euro.
Sipas aktakuzës, të pandehurit vepronin së bashku në mënyrë të organizuar për muaj të tërë, duke ftuar vajza të mitura në banesën e tyre “për strehim të përkohshëm”, por më pas i detyronin, përmes kanosjes dhe dhunës, të kryenin marrëdhënie seksuale me klientë të ndryshëm. Të miturat, përfshirë edhe motrën e një prej të pandehurave, u detyruan të frekuentonin vila dhe motele ku takoheshin me klientë të cilëve u jepej viktima në këmbim të shumave të parave që i përvetësonin vetë të akuzuarit.
Më 16 mars 2025, njëra nga të miturat kishte arritur t’i dërgojë një audio-mesazh të dashurit të saj, duke alarmuar situatën dhe duke kërkuar ndihmë. Pas ndërhyrjes institucionale, të dy të dyshuarit u arrestuan dhe rasti kaloi në trajtim të plotë ligjor.
Prokuroria bën të ditur se edhe pasi ndodhej në arrest shtëpiak, e pandehura V.H. kishte kontaktuar familjarët e viktimave përmes “Snapchat”-it, duke tentuar t’i bindte të ndryshonin deklaratat në këmbim të dhuratave dhe madje një veture “Golf 7”. Këto veprime kanë shkaktuar frikë, pasiguri dhe ankth te familjarët e viktimave.
Prokurori i çështjes ka kërkuar që të pandehurit të shpallen fajtorë dhe të dënohen konform ligjit për veprat penale “Trafikimi me njerëz” dhe “Frikësimi gjatë procedurës penale”.
Rasti që ka bërë publik Prokuroria në Ferizaj përfaqëson një nga format më të rënda të abuzimit dhe shfrytëzimit të të miturve – me pjesëmarrje direkte nga persona të afërt dhe manipulim emocional për përfitime të pista financiare. Trafikimi nuk ndodh gjithmonë në rrugë apo vende të largëta; ai ndodh edhe brenda shtëpive dhe banesave të zakonshme, përballë indiferencës së shoqërisë. Ky rast është një dëshmi se sa i nevojshëm është bashkëpunimi institucional, kujdesi i shtuar ndaj të miturve dhe sidomos një sistem drejtësie që reagon shpejt dhe pa kompromis ndaj rasteve të tilla.