Një rast shqetësues i vjedhjes është regjistruar së fundmi në kryeqytet. Sipas pamjeve të siguruara, një gruaje iu vodh kuleta në zonën e njohur si “te Plepat” në Prishtinë, nga dy persona ende të paidentifikuar.
Ngjarja ka ndodhur në një kohë kur zona është zakonisht e mbushur me kalimtarë, gjë që e bën edhe më shqetësuese guximin e autorëve. Pamjet e publikuara tregojnë momentin kur dy persona afrohen dhe me shpejtësi marrin kuletën nga çanta e viktimës.
Policia e Kosovës është njoftuar për rastin dhe ka nisur hetimet për identifikimin e autorëve. Aktualisht, organet kompetente po kërkojnë ndihmën e qytetarëve për të identifikuar dy personat që shfaqen në video.
Kushdo që ka informacione që mund të ndihmojnë në zbardhjen e këtij rasti, lutet të kontaktojë menjëherë Policinë e Kosovës në numrin 192 apo përmes formave të tjera të komunikimit zyrtar.
Ky rast është një tjetër rikujtim për qytetarët që të jenë të kujdesshëm me sendet personale, veçanërisht në vende publike.