Një rast i rëndë i fajdesë është finalizuar me aktgjykim dënues nga Gjykata Themelore në Prishtinë, ku Beqir Hoxha, banor i Prizrenit, është shpallur fajtor për dhënien e parave me kamatë të paligjshme. Sipas vendimit të gjykatës, ai është dënuar me 4 vite burgim dhe 5 mijë euro gjobë, ndërsa është urdhëruar t’i kthejë viktimës shumën e 77,500 eurove.
Sipas dosjes gjyqësore, viktima me inicialet F.S. dhe babai i tij Sh.S., për shkak të vështirësive të theksuara financiare dhe nevojës për të ruajtur biznesin familjar, kishin kërkuar ndihmë financiare nga Beqir Hoxha. Por në vend të ndihmës së zakonshme, ata ishin përballur me kushte të rënda të fajdesë, duke përfunduar me humbje financiare të konsiderueshme.
Kryetarja e trupit gjykues, Alltën Murseli, bëri të ditur se Hoxha u dënua për veprën penale “Fajdeja” sipas nenit 331 të Kodit Penal të Kosovës, paragrafi 3 në lidhje me paragrafin 1. Gjykata theksoi se nëse i dënuari nuk e paguan gjobën prej 5 mijë eurosh, ajo do të shndërrohet në burgim me ekuivalentin 20 euro për ditë burg.
Po ashtu, nëse i akuzuari nuk arrin të kompensojë shumën prej 77,500 euro, atëherë do të i konfiskohet pasuri në vlerë të barabartë me dëmin e shkaktuar.
Gjatë shpalljes së vendimit, gjykata vendosi të kthejë një telefon të konfiskuar – iPhone 11 Pro Max – të akuzuarit, por të mbajë shumën prej 700 eurosh në para të gatshme që ishin sekuestruar gjatë hetimeve.
Në seancën për shpalljen e aktgjykimit, prokurorja Arjana Shajkovci ishte e pranishme, ndërsa mungonin si i akuzuari Hoxha ashtu edhe avokati i tij, Valdet Hoxha.
Ndryshe, aktakuza ndaj Beqir Hoxhës ishte ngritur nga Prokuroria Themelore në Prizren më 6 nëntor 2023, ku ai akuzohej për dhënie të fajdesë – një vepër penale që në Kosovë trajtohet me seriozitet të lartë për shkak të ndikimit në familje, biznese dhe stabilitetin social.
Palët kanë të drejtë ankese pasi vendimi të pranohet me shkrim dhe të marrë formë të prerë.