Policia e Kosovës ka ndërmarrë një sërë aksionesh intensive kundër veprimtarive të paligjshme që lidhen me bixhozin dhe organizimin e skemave piramidale, duke përfunduar me mbylljen e 22 lokaleve dhe arrestimin e 19 personave të dyshuar.
Sipas njoftimit zyrtar, që nga fundi i muajit prill 2025, janë kontrolluar mbi 40 lokale në rajonin e Prishtinës, ku dyshohej se zhvilloheshin aktivitete të kundërligjshme. Gjatë këtyre aksioneve janë verifikuar qindra persona dhe ndaj të dyshuarve janë iniciuar raste penale për përfshirje në veprimtari të paligjshme.
Aksioni më i fundit është realizuar mbrëmjen e djeshme në qytetin e Podujevës, ku policia ka bastisur dy lokale të ndryshme. Në njërin prej tyre janë sekuestruar pesë aparate të lojërave të fatit dhe një shumë e konsiderueshme e parave të gatshme, ndërsa është arrestuar një person.
Në lokacionin tjetër, hetuesit kanë zbuluar dhe konfiskuar një sasi të narkotikëve dhe një armë të ftohtë – thikë, çka ka shtuar edhe më tej dyshimet për përfshirje në veprimtari të organizuar kriminale.
Policia ka bërë të ditur se aksionet do të vazhdojnë me qëllim parandalimin dhe çrrënjosjen e formave të paligjshme të bixhozit dhe mashtrimeve financiare që rrezikojnë sigurinë dhe mirëqenien e qytetarëve.