Prishtinë, 12 qershor 2025 – Një zjarr ka shpërthyer sot në një pjesë të objektit të “Qendrës Tregtare” në lagjen Bregu i Diellit në Prishtinë. Sipas dëshmitarëve okularë, flakët kanë përfshirë një seksion të ndërtesës, duke shkaktuar panik tek qytetarët dhe bizneset përreth.
Menjëherë pas alarmimit, ekipe të shumta të zjarrfikësve kanë arritur në vendin e ngjarjes dhe janë angazhuar në shuarjen e zjarrit, duke punuar për të vënë situatën nën kontroll dhe për të parandaluar përhapjen e mëtejshme të flakëve.
Ende nuk dihen shkaqet e zjarrit, ndërsa nuk raportohet për të lënduar deri në këtë moment. Autoritetet janë në vendngjarje dhe kanë nisur hetimet për të sqaruar rrethanat e incidentit.
Qendra Tregtare në Breg të Diellit është një ndër zonat më të frekuentuara në kryeqytet, dhe zjarri ka shkaktuar shqetësim të madh te qytetarët dhe pronarët e bizneseve që operojnë në këtë hapësirë. Policia ka siguruar perimetrin përreth për të mundësuar operacionin e zjarrfikësve dhe për të garantuar sigurinë publike.