Paniku ka përfshirë një pjesë të qytetarëve të Tiranës këtë pasdite, pasi avionë luftarakë kanë fluturuar në lartësi të ulët mbi zonat e banuara, duke krijuar zhurmë të fortë dhe dridhje në dritare. Shumë qytetarë kanë dalë jashtë banesave, të shqetësuar dhe të paqartë për atë që po ndodh.
Pamjet e publikuara në rrjetet sociale tregojnë avionë ushtarakë që kalojnë në formacion mbi zonën e “21 Dhjetorit”, “Unazës së Re” dhe “Bllokut”, duke shkaktuar frikë tek qytetarët, veçanërisht tek të moshuarit dhe fëmijët.
Sipas burimeve zyrtare të Ministrisë së Mbrojtjes, fluturimet janë pjesë e një stërvitjeje të përbashkët ushtarake me NATO-n, e cila është paralajmëruar më herët në media, por shumë qytetarë duket se nuk ishin të informuar.
“Avionët që kaluan janë pjesë e një operacioni rutinë të stërvitjes ‘Defender Europe’, e cila po zhvillohet në disa qytete të Shqipërisë,” deklaroi Ministria e Mbrojtjes.
Megjithatë, mungesa e informacionit në kohë për publikun ka shkaktuar një valë të madhe reagimesh, me shumë qytetarë që kërkojnë transparencë më të madhe në raste të tilla për të shmangur frikën e panevojshme.
Ngjarja ka rikthyer kujtimet e viteve të vështira për disa qytetarë, ndërsa në rrjete sociale është bërë viral komenti: “Menduam se kishte nisur lufta!”