Një ngjarje shqetësuese ka ndodhur sot në shkollën fillore “Meto Bajraktari” në Prishtinë, ku një nënë ka hyrë brenda një klase dhe ka goditur me shuplakë një vajzë të mitur para nxënësve dhe mësimdhënësve.
Sipas dëshmitarëve nga vendi i ngjarjes, incidenti ndodhi gjatë orës mësimore, kur nëna e një nxënëseje hyri me nervozizëm në klasë dhe iu drejtua me fjalë fyese një vajze tjetër, për ta goditur më pas me shuplakë. Motivet mbeten ende të paqarta, por burime jozyrtare thonë se gjithçka nisi pas një mosmarrëveshjeje mes vajzës së sulmuar dhe vajzës së autores.
Mësuesit reaguan menjëherë duke tentuar të qetësojnë situatën dhe thirrën policinë. Njësitë policore arritën shpejt në vendngjarje dhe larguan nënën nga ambientet e shkollës.
Policia e Kosovës ka konfirmuar rastin dhe ka nisur hetimet për “sulm fizik ndaj të miturës” dhe “hyrje të paautorizuar në institucion publik”.
Drejtoria e Arsimit në Komunën e Prishtinës ka paralajmëruar masa ndaj secilit prind që cenon sigurinë në shkolla, ndërsa shkolla ka deklaruar se do të rrisë masat e sigurisë për të parandaluar raste të ngjashme.
Ngjarja ka shkaktuar reagime të forta në rrjetet sociale, me qytetarë që kërkojnë ndëshkim të rreptë për incidentin dhe mbrojtje më të madhe për fëmijët në institucionet arsimore.