Presidenti iranian Masoud Pezeshkian ka lëshuar një deklaratë të fortë pas sulmeve ajrore që ndodhën në Lindjen e Mesme. Përmes një postimi në platformën X, ai theksoi se Irani nuk dëshiron luftë, por nuk do të lërë pa përgjigje asnjë agresion ndaj “Iranit të Madh”.
“Ne nuk e nisëm luftën dhe as nuk e deshëm, por nuk do ta lëmë agresionin kundër ‘Iranit të Madh’ pa përgjigje”, shkroi Pezeshkian.
Ai shtoi se siguria kombëtare e Iranit është vija e kuqe:
“Ne do ta mbështesim sigurinë e këtij kombi të dashur me gjithë qenien tonë dhe do t’i përgjigjemi çdo plage në trupin e Iranit me besim, mençuri dhe vendosmëri.”
Ndërkohë, Trupa e Gardës Revolucionare Islamike konfirmoi në një deklaratë zyrtare se Irani ka nisur një sulm të fuqishëm me raketa ndaj bazës ajrore amerikane Al Udeid në Katar, si përgjigje ndaj një sulmi amerikan ndaj objekteve bërthamore iraniane.
“Republika Islamike e Iranit, duke u mbështetur te Zoti i Plotfuqishëm dhe populli besnik dhe krenar, nuk do të lërë kurrë pa përgjigje asnjë agresion ndaj integritetit të saj territorial, sovranitetit apo sigurisë kombëtare,” thuhet në deklaratë.
Situata në rajon mbetet tejet e tensionuar, dhe komuniteti ndërkombëtar po ndjek zhvillimet me shqetësim të madh