Një shumë prej 90 milionë eurosh e alokuar nga Banka Botërore për Kosovën është në rrezik të humbet përfundimisht, nëse Kuvendi i Kosovës nuk e ratifikon marrëveshjen deri në muajin shtator. Këto mjete, të cilat janë siguruar në bazë të një marrëveshjeje me kamatë 0%, janë të destinuara për zhvillim ekonomik, reforma strukturore dhe përballim të krizave.
Por përkundër vlerës dhe kushteve të jashtëzakonshme të financimit – që shumë shtete vetëm do ta ëndërronin – Kosova nuk po arrin t’i vë në funksion këto mjete për shkak të bllokadës së vazhdueshme politike.
Marrëveshja është dorëzuar për ratifikim në Kuvendin e Kosovës që nga muaji maj i vitit 2024, por për shkak të mungesës së kuorumit dhe tensioneve politike ndërmjet pozitës dhe opozitës, ajo vazhdon të mbetet në pritje. Gjatë legjislaturës së kaluar, ishte kryesisht opozita ajo që refuzoi votimin e saj. Sot, situata është përkeqësuar: as pozita nuk ka siguruar konsensus të brendshëm dhe as opozita nuk po merr pjesë në seancat konstituive, duke pamundësuar formimin e legjislaturës së re dhe rrjedhimisht, edhe votimin e marrëveshjeve jetike.
Në një kohë kur Kosova përballet me sfida të mëdha ekonomike, të tilla si papunësia, zhvillimi i ngadalshëm i infrastrukturës dhe nevoja për modernizim të administratës, kjo shumë prej 90 milionë eurosh paraqet një mundësi që nuk do të duhej të refuzohej.
Banka Botërore ka vendosur një afat përfundimtar në shtator 2025. Nëse deri atëherë marrëveshja nuk ratifikohet nga Kuvendi i Kosovës, mjetet do të tërhiqen dhe shumë lehtë mund t’i ofrohen një shteti tjetër që ka nevojë dhe është institucionalisht më i qëndrueshëm.
Kjo nuk është vetëm një humbje ekonomike – por edhe reputacionale për Kosovën.
Një shtet që nuk është në gjendje të funksionojë për çështje të tilla bazike si ratifikimi i ndihmës me kamatë 0%, dërgon sinjal tejet negativ për të gjithë partnerët ndërkombëtarë.
Në këtë kontekst, faji nuk është vetëm i opozitës apo pozitës, por i të gjithëve që po vendosin interesin politik para interesit shtetëror. Është detyrë e të gjitha forcave politike që të dalin nga logjika e bllokadës dhe të veprojnë në funksion të qytetarëve që i kanë votuar.
Në vend që të bëhen pengesë për njëra-tjetrën, palët duhet të bashkëpunojnë për të mirën e përbashkët. Në fund të fundit, është e pakuptimtë që interesat politike të kthehen në pengesë për një ndihmë të tillë historike – e cila nuk përsëritet lehtë.
Rasti i 90 milionë eurove nga Banka Botërore është një provë reale e gatishmërisë së Kosovës për të funksionuar si shtet. Nëse dështon kjo marrëveshje për shkak të lojërave politike, pasojat do të shtrihen përtej kësaj shume – ato do të ndikojnë në mënyrën si e sheh Kosova veten dhe si e sheh bota Kosovën.
