Bahtiri ka theksuar se një aleancë me PDK-në është e papranueshme për të dhe, nëse realizohet, do të tërhiqet jo vetëm nga Vetëvendosje, por edhe nga pozita e deputetit.
“Unë nuk e besoj atë asnjëherë. Por, një po du me ju tregue, ky është mendim i imi personal – në atë moment që LVV-ja shkon me PDK-në unë nuk do të jem më në atë listë. Do të heq dorë nga Vetëvendosje. Ndoshta do të heq dorë edhe nga deputeti për arsye se dihen veprimtaritë e këqija që i kanë bërë gjatë kësaj periudhe pas luftës,” deklaroi ai.
Pavarësisht zërave për një koalicion të mundshëm VV-PDK, Bahtiri shprehu bindjen se partia e tij aktualisht i ka numrat e nevojshëm për formimin e Qeverisë dhe bëri thirrje për përkrahje ndaj Albulena Haxhiut si kandidate për kryeparlamentare nga VV.
Nga ana tjetër, anëtari i kryesisë së PDK-së, Enver Hoxhaj, u shpreh i hapur për një koalicion të tillë, duke mos përjashtuar mundësinë që kandidati për kryeministër të jetë nga secila palë, edhe pse preferenca e tij është Bedri Hamza.
“Nuk dua të lëshohem në një skenar të tillë, me Kurtin kryeministër apo me Bedri Hamzën kryeministër? Natyrisht se ne do ta pranonim me çdo kusht që Bedriu të jetë kryeministër, por këto janë tema që do t’i zgjidhim kur të ulemi në tavolinë”, u shpreh Hoxhaj.
Ndërkohë, kryetari aktual i PDK-së, Memli Krasniqi, është deklaruar kundër një koalicioni të tillë, duke e përjashtuar kategorikisht bashkëpunimin me VV-në:
“Me Listën Serbe ndoshta, me neve s’mundet,” tha ai, me një ironi që e bën edhe më të qartë qëndrimin e tij refuzues.
Në këtë situatë, Vetëvendosja rrezikon jo vetëm një përçarje të brendshme, por edhe humbjen e disa prej figurave të saj të rëndësishme, në rast se vendos të bashkëpunojë me PDK-në.
Deklarata e Agim Bahtirit është një sinjal i qartë i tensioneve të brendshme në VV, veçanërisht në një moment kur po shtohen spekulimet për një koalicion me PDK-në. Edhe pse ky skenar mbetet ende hipotetik, reagimi i Bahtirit tregon se një hap i tillë mund të ketë pasoja serioze për unitetin dhe koherencën ideologjike të Lëvizjes Vetëvendosje. Nga ana tjetër, përçarjet brenda PDK-së për të njëjtin koalicion sinjalizojnë një terren të paqëndrueshëm politik, ku interesat personale dhe partitake po sfidojnë çdo kalkulim tradicional.