Një zjarr i madh ka shpërthyer pasditen e sotme në një zonë të banuar pranë Ulqinit, duke shkaktuar panik tek banorët dhe ndërhyrje të menjëhershme të ekipeve zjarrfikëse.
Sipas raportimeve fillestare nga dëshmitarë në terren, flakët janë përhapur me shpejtësi për shkak të erërave të forta dhe temperaturave të larta, duke rrezikuar edhe shtëpi të banimit dhe prona private.
Aktualisht nuk ka të dhëna për viktima apo të lënduar, por disa banorë janë evakuuar për arsye sigurie.
“Zjarrfikësit janë në terren me kapacitete të shtuara. Kemi kërkuar ndihmë edhe nga komunat përreth”, – tha një zyrtar i shërbimit emergjent në Ulqin.
Flakët po përhapen në një zonë ku ka shumë bimësi dhe struktura druri, duke rritur rrezikun e përhapjes së mëtejshme.
Ekipet e shpëtimit janë duke bërë çmos për ta lokalizuar zjarrin, ndërsa autoritetet u bëjnë thirrje qytetarëve që të shmangin zonën dhe të ndihmojnë me informacion në rast se shohin përhapje të mëtejshme.
Në orët në vijim pritet një njoftim zyrtar mbi shkaqet e mundshme të shpërthimit të zjarrit, ndërsa hetimet kanë nisur për të përcaktuar nëse bëhet fjalë për zjarrvënie të qëllimshme apo aksidentale.
🔔 Ky është një lajm në zhvillim – NovaFlash do të ju mbajë të informuar për çdo të re