Kryeministri në detyrë i Kosovës, Albin Kurti, ka paralajmëruar për një skenar tejet të rrezikshëm që mund të ndodhë nesër, më 28 qershor, në Gazimestan, gjatë shënimit të festës së Vidovdanit nga komuniteti serb. Në mbledhjen e sotme të qeverisë, Kurti tha se ka sinjale të qarta nga institucionet e sigurisë dhe inteligjencës se Beogradi zyrtar po përgatit një akt destabilizimi për të larguar vëmendjen nga kriza e brendshme politike në Serbi.
Sipas Kurtit, pushteti në Beograd, i goditur nga protesta të shumta studentore dhe qytetare, po përpiqet që krizën e brendshme ta eksportojë në Kosovë, përmes organizimit të një tubimi masiv dhe të ngarkuar me simbole provokuese. Ai paralajmëroi se janë identifikuar grupe të organizuara nga Serbia, Mali i Zi dhe Bosnja e Hercegovina që pritet të marrin pjesë në ceremoninë në Gazimestan, të shoqëruar me flamuj nacionalistë serbë dhe rusë.
“Fatkeqësisht, Vidovdani – që është një festë me karakter fetar – përdoret nga autoritetet e Serbisë për retorikë nacionaliste, klero-nacionaliste dhe për të krijuar tensione politike. Kjo përbën një rrezik real për paqen dhe sigurinë në Kosovë”, deklaroi Kurti.
Ai theksoi se Qeveria e Kosovës nuk do të tolerojë asnjë veprim që bie ndesh me rendin dhe sigurinë publike. “Tubimet duhet të jenë të ligjshme dhe në përputhje me vlerat demokratike, jo instrumenta të një regjimi në krizë që synon të paraqitet si mbrojtës i interesave kombëtare përmes provokimeve”, tha Kurti.
Në këtë kontekst, Kurti i bëri thirrje qytetarëve serbë që jetojnë në Kosovë të mos bien pre e manipulimeve politike nga Beogradi dhe të qëndrojnë larg provokimeve. Ai kërkoi gjithashtu nga qytetarët tjerë që të shmangin çdo përplasje.
Ndërkohë, në pjesën e dytë të mbledhjes, Kurti foli edhe për përfundimin e samitit të 34-të të NATO-s që u mbajt në Hagë, ku u diskutua zgjerimi i buxheteve të mbrojtjes dhe përkushtimi ndaj nenit 5 për mbrojtje kolektive.
Ai përshëndeti gjithashtu vendimin për mbajtjen e samitit të ardhshëm të NATO-s në vitin 2027 në Tiranë, duke shtuar se Kosova po shton investimet në mbrojtje dhe se vetëm sot Forcës së Sigurisë së Kosovës i janë shtuar edhe 35 rekrutë të rinj – pjesë e një zgjerimi prej 2700 pjesëtarësh gjatë këtij mandati.
Paralajmërimi i Albin Kurtit vjen në një moment jashtëzakonisht të ndjeshëm për rajonin. Ngjarjet që mund të zhvillohen nesër në Gazimestan, nëse vërtetë janë të nxitura nga autoritetet serbe, mund të shkaktojnë përshkallëzim të menjëhershëm të tensioneve ndëretnike dhe politike në Kosovë. Shfrytëzimi i simboleve ruse dhe nacionaliste nga individë të ardhur nga jashtë jo vetëm që përbën provokim të drejtpërdrejtë, por mund të ndezë një zinxhir reagimesh të paparashikueshme.
Beogradi, në përpjekje për të amortizuar protestat e brendshme, mund të jetë duke kalkuluar rrezikshëm me stabilitetin rajonal. Në këtë kuadër, është jetike që institucionet e Kosovës të veprojnë me vendosmëri, por edhe me maturi, duke garantuar sigurinë pa rënë në grackën e provokimeve. Roli i bashkësisë ndërkombëtare, veçanërisht i EULEX-it dhe KFOR-it, do të jetë kyç për të parandaluar çdo formë të eskalimit që do ta rikthente Kosovën në faqet e krizave të viteve të kaluara.