Prishtinë – Prokuroria Speciale e Republikës së Kosovës ka ngritur aktakuzë zyrtare ndaj ministrit në detyrë të Zhvillimit Rajonal, Fikrim Damka, dhe sekretarit të tij B.K., duke i akuzuar për keqpërdorim të pozitës apo autoritetit zyrtar, në një rast që përfshin fonde publike mbi 1 milion euro.
Sipas aktakuzës, Damka dhe bashkëpunëtori i tij kanë tejkaluar kompetencat ligjore gjatë periudhës gusht 2021 – mars 2022, duke financuar organizatat “Germin” dhe “Caritas Zviceran” pa organizuar asnjë thirrje publike, në kundërshtim me legjislacionin për OJQ-të dhe menaxhimin e financave publike.
Dokumentet flasin për një dëm të drejtpërdrejtë buxhetor në vlerë prej 1,040,000 euro të ndara përmes një memorandumi bashkëpunimi, për të cilin opozita dhe ekspertët juridikë pretendojnë se është përdorur për të shmangur procedurat ligjore.
Prokuroria kërkon dënime me burg dhe gjoba, duke argumentuar se vetëm në këtë mënyrë do të arrihet efekti parandalues dhe ndëshkues që parashikon neni 38 i Kodit Penal.
Deputetja Musliu-Shoshi: Aferë e paramenduar dhe e organizuar
Skandali u denoncua fillimisht nga deputetja e PDK-së, Ariana Musliu-Shoshi, e cila e cilësoi këtë si një rast tipik të abuzimit institucional me qëllim përfitimi, duke përfshirë dy ministra dhe organizata që nuk kanë status ndërkombëtar, çka e bën marrëveshjen të paligjshme sipas ligjit për marrëveshjet ndërkombëtare.
Në qendër të debatit është vendimi për të financuar Caritas-in Zviceran, një OJQ e regjistruar në Kosovë, përmes një marrëveshjeje që nuk ka kaluar as përmes qeverisë apo ministrit të financave, dhe që sipas PDK-së ka kaluar përmes mbështetjes nga Donika Gërvalla, në cilësinë e zëvendëskryeministres.
Rasti i ministrit Damka është një sinjal alarmi për mënyrën se si fondet publike mund të shpërndahen pa mbikëqyrje të duhur ligjore. Mungesa e transparencës dhe shmangia e procedurave përmes “memorandumeve” që anashkalojnë ligjin, rrezikon të kthehet në normë. Ky rast tregon se menaxhimi i parasë publike kërkon kontrolle më të rrepta, jo vetëm nga drejtësia, por edhe nga shoqëria civile dhe media.
Burimi: Prokuroria Speciale e Republikës së Kosovës